鑑古通今,一起回味每段遊戲浪漫史。
為大家帶來打機及動漫資訊。
遊戲或違奧林匹克精神 電競入奧受阻
09月05日

雅加達亞運會早前順利舉行,電子競技亦都成為咗今屆嘅「示範項目」,所謂嘅「示範項目」,講白啲就係成為正式項目之前嘅跳板,被選為「示範項目」嘅比賽項目,通常都好大機會喺日後(最快下一屆)被列為正式項目,例如今時今日非常主流嘅羽毛球項目,其實就係喺1958年嘅東京亞運中被列為「示範項目」,之後再變成正式項目。而下一屆亞運,亦即係2022年嘅杭州亞運會,亦鐵定會將電子競技列為正式比賽項目。

雖然對於電子競技係咪應該被列為體育項目,以至被列入世界級運動會嘅比賽項目仍有爭議,但無可否認,電子競技嘅專業化進程同埋被接受程度一日千里,能夠登上亞運會舞台更加係體育界別對電競項目嘅一種認可,至此,如果要再進一步提高電競項目嘅認受性同普及程度,其中一項最有效而直接嘅途徑,就係將電競納入為奧運會項目之一。

要將電競項目推上奧運舞台,有一定難度,但絕非冇可能,特別係喺亞運會作出咗示範之後,當然有好多傳統運動界人士反對,認為電競只係打機玩玩下,缺乏身體鍛鍊同運動精神,難登大雅之堂。不過,現時一級嘅電競選手其實都需要接受嚴格嘅體能訓練,亦有相當於傳統運動員嘅心理質素鍛鍊,唔少遊戲界、電競界人士都好希望奧委會可以早啲為佢哋打下強心針,可惜事與願違,奧委會主席Thomas Bach早前出席記者會時特別提到「我哋唔能夠將有暴力或歧視成分嘅遊戲列為奧運比賽項目」,佢仲特別點名部分遊戲係「殺人遊戲」,同奧運精神相違背,此言論一出,可謂全面封殺咗部分遊戲,基本上所有槍Game都唔使旨意入到奧運,可惜嘅係射擊遊戲係電競項目其中一大範疇,奧委會此決定一出猶如斷咗電競一臂。

而另一類主流電競類別--MOBA(Multiplayer Online Battle Arena),即係類似League of Legends、DOTA嗰類可能亦難逃一劫,因為遊戲中難免帶有「暴力」色彩,另一方面,格鬥Game又算唔算暴力呢?如果Ban晒以上呢幾類遊戲,其實重可以進行競技又具高平衡性嘅遊戲種類亦剩返唔多,唔通最後得體育類遊戲好似FIFA、NBA呢啲先上得到奧運會嘅大台?呢啲一系列嘅問題同阻礙,都係電競業界需要盡快解決嘅議題,不過又咁講,雖然出現咗少少阻滯,但發展電競產業仍然係現今世界大潮流之一,希望電競項目能夠盡快爭取到加入奧運,藉以提高普羅大眾對呢樣項目嘅認受性,洗刷「打機冇前途」嘅污名啦。