當打機動漫成為了生活的一部分,絕對會為日常增添不少趣事。
為大家帶來打機及動漫資訊。
807隻小精靈齊晒 官方真‧寵物小精靈圖鑑
09月12日

807隻小精靈齊晒 官方真‧寵物小精靈圖鑑

「Pokémon,日夜鍛鍊去取勝」,寵物小精靈系列自1996面世以嚟,其受歡迎程度一直有增無減,由一開始嘅遊戲同動畫,發展出各式樣嘅副產品,逐漸成為世界知名嘅一線作品,系列續作長出長有,小精靈(官方名稱「寶可夢」)嘅數目亦隨之增加,由一開始嘅151隻,去到呢刻總共有807隻。

喺重係得151隻嘅年代,小編基本上每隻都識得晒,叫得出佢哋啲名,同埋講得到每一隻嘅特性,但隨住小精靈數目越嚟越多,一啲比較少見嘅真係唔係太認得到,咁就只能夠上網查啦,或者搵下啲非官方嘅維基資料,有時都會幻想下,如果真係有部小精靈圖鑑就好啦。如果你曾經都有過呢個諗法,機會嚟啦飛雲,事關The Pokémon Company(即係出Pokémon嗰間公司)啱啱就正式推出咗官方認證,而且係繁體中文版嘅線上「小精靈圖鑑」(寶可夢圖鑑)。

呢個「小精靈圖鑑」收錄哂現有807隻小精靈嘅資料,由身高、體重,到特色、分類、屬性、弱點一應俱全,重要連MEGA進化嘅版本都有埋(例如外號係「X噴」嘅超級噴火龍X),而各種「阿羅拉版本」嘅特殊精靈亦冇被遺漏,甚至連最新嘅「究極異獸」都搵得到,驟眼睇資料都算幾齊,最緊要係呢個圖鑑由官方自家推出,資料擔保準確!

不過大家要留意返,皆因早前官方執意要統一華文譯名,所以部分小精靈個名可能同大家細細個聽嗰啲有啲出入(例如小精靈叫寶可夢,比卡超叫皮卡丘,奇異種子叫妙蛙種子等等),但冇計呢個係官方政策,因為連最新遊戲都採用晒呢套統一譯名,相信官方亦唔會走回頭路,各位訓練家只好習慣下啦。

真‧寵物小精靈圖鑑:http://bit.ly/2OcU5FP