鑑古通今,一起回味每段遊戲浪漫史。
為大家帶來打機及動漫資訊。
痴線到申請入健力士 史上最多人嘅無雙遊戲
10月02日

痴線到申請入健力士 史上最多人嘅無雙遊戲

而家啲遊戲宣傳嗰陣動不動就話「史上最乜乜乜」,好似好勁咁,但大多數都冇乜根據,隨時違反商品說明條例!不過暗榮最近推出嘅《無雙Orochi 3》就真係唔講得笑,呢隻被喻為《無雙》系列史上最多可用角色嘅最新作品,為咗證明真係好多角色可以用,居然去咗申請加入健力士世界紀錄,而健力士又真係接納咗佢嘅申請,重要Approve埋。

健力士世界紀錄日前正式認證《無雙Orochi 3》為現今全世界入邊「最多可操控角色嘅『砍殺』類電子遊戲」,英文原文係「Most playable characters in a hack-and-slash videogame」,其中嘅「hack-and-slash」你可以解做「砍殺」啦,又或者講白啲就係無雙類遊戲(唔單只暗榮自己出嘅《無雙》系列)。新作《無雙Orochi 3》除咗原有嘅《三國無雙》同《戰國無雙》角色外,重加入咗以往「蛇魔」系列嘅外傳角色,同埋全新嘅希臘神話人物,總共可操控角色多達170個,每個試玩3分鐘都要都要八個半鐘先試晒招,認真痴線!

《真‧三國無雙8》早前大改革,變咗做半Open World畀人鏟到上天花板,重成為咗其中一隻史上最伏嘅Game,但雷隊長玩過《無雙Orochi 3》之後覺得新作為《無雙》系列扳回唔少面子,首先Game唔係咩開放世界,而係最原始嘅《無雙》玩法,角色多選擇得嚟每個人都叫做有唔同嘅招式,唔係完全Copy,新加入嘅神器系統亦都幾有趣,畀玩家喺輕攻擊、重攻擊、無雙技以外,可以多啲戰鬥時嘅選擇,劇情就……玩得《無雙》唔好諗劇情啦!起碼新作玩起上嚟係爽嘅,唔使點用腦,打得夠Hyper,符合買《無雙》系列嘅期望。

BTW雷隊長相信呢個世界紀錄短期內都唔會有遊戲打破到,就算又有人打破到,好大機會都係呢隻系列嘅續作……