每周遊戲熱話,Game壇最新動態,即時為你放送。
為大家帶來打機及動漫資訊。
唔敢一個人玩系列 免費VHS風恐怖遊戲
10月08日

雷隊長認為,要定義一隻恐怖遊戲成唔成功好簡單,睇下隻Game嚇唔嚇到人就得,如果用呢個標準,咁呢隻Game一定好成功,因為雷隊長而家重淆緊底……本住「不能只有我嚇到」嘅精神,決定同大家介紹呢隻完全免費嘅恐怖遊戲--《September 1999》。

《September 1999》係一部獨立作品,嚴格嚟講係一部小品遊戲,流程一啲都唔長,快手嘅朋友五至十分鐘內就爆到機,遊戲以第一身視點進行,畫面採用VHS舊式錄影帶風格(如果你唔知係乜證明你太年輕了),增添咗幾份恐怖味道,喺遊戲中你需要利用鍵盤上嘅WASD鍵嚟進行移動同探索,然後解開恐怖故事背後嘅謎團。

本作係一隻低成本開發作品,遊戲中採用大量自行拍攝嘅實景作為遊戲畫面,雖然係小品獨立製作,但遊戲中嘅氣氛營造非常之高質,好容易令玩家代入到故事當中,當你不斷搵到更多線索,慢慢得悉故事嘅真相...你就會明白呢隻Game嘅恐怖之處。

基於本作遊戲流程唔長,雷隊長都唔劇透太多,有興趣嘅朋友可以自行下載試下。

下載傳送門:http://bit.ly/2y6EtxI

或者你懶到唔想下載下邊有完整Game Play