當打機動漫成為了生活的一部分,絕對會為日常增添不少趣事。
為大家帶來打機及動漫資訊。
真‧爆機達人 健力士紀錄擁有最多白金獎盃嘅人
4日前

真‧爆機達人 健力士紀錄擁有最多白金獎盃嘅人

古語有云行行出狀元,做嘢可以,打機亦都可以。唔少達人級玩家都好鍾意為自己Set一啲挑戰,透過達成目標,去證明自己打機嘅實力,挑戰方法有好多種,有啲人會追求Speed Run同時間競賽,有人會晉身電競圈劍指各大賽嘅冠軍,而呢位叫做Hakoom嘅達人就選擇咗用收集遊戲獎盃嘅方法去證明自己。

近年遊戲界嘅獎盃系統大行其道,各大平台都有自己專屬嘅類似系統,而喺PlayStation平台上,最高榮耀嘅獎盃就係「白金獎盃」,一般嚟講,要取得某隻遊戲嘅白金獎盃,你需要先拎晒嗰隻Game嘅其他全部獎盃,而每隻遊戲都總有一啲獎盃係勁難拎,好似係要喺某啲好困難嘅特殊條件下通過某一關咁。所以當你取得某某遊戲嘅白金獎盃,就代表你真真正正徹徹底底「打爆」並「玩盡」嗰隻遊戲,可以話係你已經Master咗隻Game,而呢位叫做Hakoom嘅玩家,最近就刷新咗健力士紀錄上「全球擁有最多白金獎盃嘅玩家」呢個Record,真真正正做到打機打到歷史留名。

據真‧爆機達人Hakoom所講,佢過去十年內差唔多每日都要用成10到20個鐘去打機,佢打機嘅目標就係要100%完成遊戲,而拎白金獎盃就係一個非常好嘅指標,根據獎盃排行網站 PSN Trophy Leaders資料顯示,佢而家擁有至少1717個白金獎盃(佢登錄健力士認證嘅時候有1691個),雷隊長望下自己個帳號,我真係覺得自己是零……