當打機動漫成為了生活的一部分,絕對會為日常增添不少趣事。
為大家帶來打機及動漫資訊。
Sony推「重生計劃」 PSN個名終於有得改!
10月11日

Sony推「重生計劃」 PSN個名終於有得改!

正所謂唔怕生壞命,最怕改壞名,但偏偏好多人改PSN ID嗰陣都係求其改,例如咩Apple1234、Banana5678咁(豬隊友表示我都係咁……),偏偏唔知做乜鬼,一直以嚟Sony死都唔肯開放PSN改名功能,就算多年嚟有大量玩家聯署要求增加改名系統,罪大滔天嘅索尼都係不為所動,如果你同豬隊友一樣,恨改名恨咗好多年,咁機會嚟啦飛雲!

事關Sony終於一改多年嘅政策,正式宣布佢哋將會推出「PSN Online ID Change」計劃,呢個計劃會率先推出Beta版本,官方會選定部份用戶作為先行測試對象,「被揀中嘅小朋友」會收到通知,呢班幸運兒可以喺11月底前免費改一次PSN用戶名,點解會特別提免費呢?因為呢項計劃係要畀錢嘅,以後每次改名將要畀10美元,如果你係PSN Plus會員就半價5美元,即係大概港紙40蚊左右。

未被揀中又想改名嘅朋友都唔使灰心,因為呢項計劃已預定喺下年年頭推出,到時只要畀錢就改到名,冇名額限制。不過需要特別留意嘅係,部分舊Game可能唔支援更改用戶名稱,呢類Game就算玩家改咗名,返到入遊戲內都係用返舊名,Sony就話遲下會整合一份「不兼容遊戲名單」畀大家參考,不過豬隊友相信呢類遊戲喺PS4上唔會太多。