當打機動漫成為了生活的一部分,絕對會為日常增添不少趣事。
為大家帶來打機及動漫資訊。
唔係搞Gag真係有得賣 土豪專用PS4手掣
10月19日

唔係搞Gag真係有得賣 土豪專用PS4手掣

唔少機友都好鍾意「改機」,例如幫部PS4換下固態硬碟等佢行快啲,買啲貴價HDMI線自我感覺良好好似畫面又靚啲,再豪啲就改下外殼、「痛機」整啲彩繪裝飾上去咁。但大家又有冇幻想過,真正嘅土豪係點打機嘅呢?佢哋又會買啲咩土豪配件?

唔係搞Gag真係有得賣 土豪專用PS4手掣
普通版(8495美金)

一間專出產高級周邊配件嘅生產商Brikk最近就推出咗一款名為「The Lux Dualshock 4 Controller」嘅土豪專用PS4手掣,用上24K鍍金作為手掣本體材料,再喺手掣中間嘅PS鍵上鑲上7粒總共0.25卡重嘅鑽石,再配合埋18K足金做配飾,盛惠8495美金(約HKD$66000)。

唔係搞Gag真係有得賣 土豪專用PS4手掣
豪華版(13955美金)

嫌唔夠豪?唔緊要,Brikk重推出咗另一款「真‧土豪版」(Deleux Version),除咗PS鍵上有鑽石之外,左邊四個方向鍵同埋右邊嗰四粒掣全部都鑲晒鑽石,所有鑽石加埋有成2.2卡(重多過唔少人隻結婚戒指……),「真‧土豪版」賣價13955美金,計返港紙都係11萬左右,唔貴吖!(好似係)不過啲掣鑲上鑽石會唔會變到難撳呢?可惜豬隊友冇錢入手幫大家做評測,這些機會不是屬於我的T_T

呢個手掣已經正式係官方網站發售緊,重可以全球付運,有興趣同財力嘅朋友入手完記住借畀我玩下啦!