鑑古通今,一起回味每段遊戲浪漫史。
為大家帶來打機及動漫資訊。
【有種遊戲叫金庸(上)】 香港有份製作 初代PS中文遊戲先驅
11月01日

【有種遊戲叫金庸(上)】 香港有份製作 初代PS中文遊戲先驅《射雕英雄傳》

一代文壇泰斗驟然離世,一眾金迷都有唔同嘅悼念方式,大師留畀我哋嘅除咗有14部經典小說,更加重要嘅係一個又一個完整而遼闊嘅武俠世界。金庸嘅作品曾被無數次改編,除咗製作成各式各樣嘅影視作品,其實亦為遊戲世界帶嚟咗數之不盡嘅題材,我哋將分成上、中、下三集,同大家介紹一下幾部燴炙人口嘅經典金庸遊戲。

PlayStation首部「全中文遊戲」

【有種遊戲叫金庸(上)】 香港有份製作 初代PS中文遊戲先驅《射雕英雄傳》

去到2018年,支援中文嘅家用機遊戲並唔係一件咩特別事,甚至對某啲玩家嚟講係基本嘢,但我哋時光倒流去返90年代尾、21世紀初,家用機市場畀初代PlayStation壟斷緊嘅時候,「家用機中文遊戲」可以話係一件非常之遙不可及,玩家們諗都唔敢諗嘅事,但就喺呢個時候,一部由日本SONY牽頭、金庸參與監製工作、香港人都有份製作嘅「全中文遊戲」居然喺PS1上出現咗。

【有種遊戲叫金庸(上)】 香港有份製作 初代PS中文遊戲先驅《射雕英雄傳》

相信呢部喺初代PS上登場嘅《射鵰英雄傳》係好多人第一次喺PS1,甚至全家用機上接觸過嘅中文遊戲,呢部喺2000年發行嘅RPG作品,佢嘅中文化非常徹底,唔單只全遊戲界面改晒做中文,加上全中文字幕(居然有得揀簡體或者繁體!),重要有埋全程中文配音,呢種中文化規格就算係今時今日嘅遊戲都未必追得上,喺當時嘅華文遊戲世界更加係劃時代嘅製作,被奉為經典中嘅經典。大家試諗吓,係2000年嘅時候啵,當年喺日本,金庸嘅作品重未係好Hit,甚至乎有部分作品都重未被翻譯成日文,金庸嘅影視作品亦冇咩點引進過日本,一間日本遊戲廠商,居然願意為呢部故事推出中文遊戲,重要有埋高水準中文配音(玩過就知真係好高質,絕對唔係Hea讀),簡直係匪夷所思。

遊戲史上第一次

【有種遊戲叫金庸(上)】 香港有份製作 初代PS中文遊戲先驅《射雕英雄傳》

另一方面,呢隻Game亦係SONY首次喺日本以外嘅亞洲地點發布嘅全新遊戲,當年遊戲界基本上有個不成文規定,如果要出新Game,又要喺亞洲發布嘅話,發布地點一定係日本,而呢隻《射鵰英雄傳》嘅首發發布會,居然係喺台灣,由此可見呢隻Game可以話係SONY嘗試開發華文市場嘅第一步,而當年翻版當道,特別係喺華文社會,打得PS1嘅,十個有八個都係玩老翻,中文遊戲老外又唔會買帳,選擇進入華文市場,SONY其實都好博。從某個程度嚟講,我哋今日有咁多中文Game打,可能都要多謝呢部先驅者遊戲--《射鵰英雄傳》!

三大屬性相剋 獨特嘅戰鬥系統

【有種遊戲叫金庸(上)】 香港有份製作 初代PS中文遊戲先驅《射雕英雄傳》

講返隻Game,《射鵰英雄傳》係一款回合制RPG遊戲,都算係一部「王道式RPG」,雖然由日廠製作,但「日系味」並唔濃烈,相反極之有中國武俠風格(有啲似當年台灣廠製作嘅PC武俠Game),遊戲採用咗一個頗為特別嘅戰鬥系統,主角會隨住劇情推移而學到唔同武功,而唔同武功又會被歸類成「內功」、「輕功」、「外功」三大類(喺呢隻Game入邊,輕功都係可以拎嚟打人),三類武功有相剋屬性,外功剋輕功,輕功剋內功,內功剋外功,就好似包剪揼咁,概念簡單,但玩法非常多變,「估對方出咩招」成為咗戰鬥取勝嘅關鍵,只要「捉到路」基本上都唔會點卡關,戰鬥時嘅動作亦都幾流暢,喺當年標準嚟睇算係上乘作品。

「江南七怪」變「江南一怪」

【有種遊戲叫金庸(上)】 香港有份製作 初代PS中文遊戲先驅《射雕英雄傳》

劇情方面,早期劇情都叫做忠於原著,但遊戲中後段就開始多咗好多「個人幻想」,結局亦有作修改,但相比起部分「爛尾作品」,呢隻《射鵰英雄傳》都叫做完滿地畀咗一個結局大家,大體亦同原著差不多,少少改篇可以接受。遊戲中亦有一啲比較好笑嘅小修改,例如「江南七怪」變「江南一怪」由七個人變咗得返柯鎮惡一個,歐陽鋒打打下變咗怪獸,完顏紅烈又會化身「魔鬼」等等,頗具「創意」。

香港參與製作 金庸有份監修

【有種遊戲叫金庸(上)】 香港有份製作 初代PS中文遊戲先驅《射雕英雄傳》

雖然《射鵰英雄傳》本體部份喺由SONY旗下日本工作室牽頭製作,但隻Game嘅配音部分則起用咗唔少香港人,例如遊戲主角郭靖嘅配音就係由TVB配音員葉清所配(曾任TVB配音組,曾為黃日華版嘅《天龍八部》、電影《無間道》配音),而遊戲中嘅動畫製作,則全部交由香港公司「先濤數碼」製作(曾參與《風雲》、《滿城盡帶黃金甲》、《少林足球》等電影製作)。當年官方進行宣傳嘅時候,更表明本遊戲曾邀請金庸幫手監修,當然所謂「監修」可能只係幫手望兩望,但已足以令到本遊戲進一步獲得一眾金迷重視。

PS1上第一隻 亦係最後一隻真‧中文遊戲

【有種遊戲叫金庸(上)】 香港有份製作 初代PS中文遊戲先驅《射雕英雄傳》

《射鵰英雄傳》喺2000年推出,作為SONY打入華文市場嘅第一步,本作亦係PS1上最後一隻「全中文遊戲」,事關隻Game推出完冇耐,PS2就喺同年正式發售,《射鵰英雄傳》可以話係PS1主機上嘅末代原創大作,從某個角度去睇,呢隻Game喺亦係日系Game廠嘗試走入華文市場嘅第一步,作為家用機中文遊戲嘅先驅者,喺遊戲史上絕對值得佔有一個特別嘅地位,唯一可惜嘅係,本作之後並無續作,亦未曾以其他形式推出復刻版,想重溫舊夢嘅朋友,一係就去二手市場搵返隻PS1碟(重要有部機),再唔係就只好向模擬器埋手啦。(當然最希望SONY可以重推復刻版啦,就算係只得網上下載版,相信都有大把Fans肯買!)