鑑古通今,一起回味每段遊戲浪漫史。
為大家帶來打機及動漫資訊。
【有種遊戲叫金庸(中)】 一直被模仿從未被超越 PC上最經典嘅武俠遊戲
11月02日

【有種遊戲叫金庸(中)】 一直被模仿從未被超越 PC上最經典嘅武俠遊戲《金庸群俠傳》

上集同大家講完家用機上最經典嘅金庸作品《射鵰英雄傳》(上集重溫:http://bit.ly/2SEbp9t),今次就當然輪到PC代表啦,相比起家用機,PC平台上推出過嘅金庸遊戲相對較多,主要原因係因為出得金庸Game嘅廠商,大多都係大中華地區嘅遊戲開發商,而當年嘅華文廠通常都係以開發PC Game為主,相對少涉獵家用主機。PC平台上嘅金庸遊戲多如繁星,就咁數都可以數到好幾款比較出名嘅,例如《鹿鼎記》、《神鵰俠侶》、《天龍八部》、《笑傲江湖之日月神教》等等,不過對於一眾資深玩家嚟講,就只有唯獨那麼一款遊戲,係永遠不能被忘記嘅,一講到武俠遊戲,就算過咗超過20年,佢嘅經典地位,仍然係無法被取代……

極高自由度嘅武俠遊戲

【有種遊戲叫金庸(中)】 一直被模仿從未被超越 PC上最經典嘅武俠遊戲《金庸群俠傳》

90年代嘅PC玩家,基本上都一定有玩過呢部經典嘅RPG遊戲《金庸群俠傳》,嗱嗱嗱!係講緊單機嗰隻,唔係網龍嗰隻Online Game啵,呢隻喺1996年由智冠推出嘅武俠遊戲雖然已經推出咗20年有多,但時至今日,仍然被唔少Game迷奉為經典,而呢隻Game其中一項最成功嘅地方就係「自由度」。時間撥返去90年代,嗰陣嘅RPG遊戲十居其九都係單一嘅線性遊戲,即係得一條劇情線,一個結局,就算係有支線任務,都係啲無關痛癢嘅小分支,唔會點影響到劇情,但《金庸群俠傳》就主打高自由度,隻Game真係畀到玩家一眾「行走緊江湖」嘅感覺,喺遊戲中你可以選擇做一個行俠仗義嘅好人,或者壞事做盡嘅大魔頭,遊戲中設有「道德指數」,依照主角待人處事態度手法嘅不同,數值亦會受到影響,而唔同數值又會影響到NPC對你有唔同嘅反應,從而影響劇情,呢種高自由度所營造出嚟嘅高投入感,係令許多玩家不能自拔嘅「元兇」,可能用今日嘅標準,呢種所謂嘅自由度唔算得係咩,但記住呢隻Game係1996年推出,22年前,呢種高自由度玩法所謂係非常破格,即使話佢係早期嘅Open World遊戲亦絕不為過。

集金庸14部作品之大成

【有種遊戲叫金庸(中)】 一直被模仿從未被超越 PC上最經典嘅武俠遊戲《金庸群俠傳》

除咗高自由度,要數呢隻Game最成功嘅地方,一定係「大集合」嘅遊戲設定,喺呢隻Game面世之前,就算真係要出小說改篇嘅武俠遊戲,大多廠商都係以單一部作品改編製作而成,但智冠當年好聰明,佢唔係用任何一部金庸作品做遊戲劇情,而係大集匯,將金庸14部小說全部集合埋一齊推出「群俠傳」,將所有睇過金庸小說,哪怕只係睇過一部嘅玩家全部一網打盡,將金庸小說筆下大部分嘅武林中人帶到去同一個時空入邊,透過一個架空世界將部分嘅經典小說劇情串連起嚟,而且主角可以自行選擇同各式各樣嘅經典角色組隊,共同抗敵,呢個設定喺當年真係非常破天荒。

武林絕學放題

【有種遊戲叫金庸(中)】 一直被模仿從未被超越 PC上最經典嘅武俠遊戲《金庸群俠傳》

金庸小說其中一項最引人入性嘅元素,就係嗰啲各門各派嘅武功絕學,喺原著當中,就算你係主角或者隱世高手,最多都係學到三、四招絕學,重要受到門派限制,但玩家喺遊戲當中,只要你肯花時間,有門路,基本上你講得出嘅絕學,全部都學得到,咩獨孤九劍、降龍十八掌、辟邪劍法、玄鐵劍法、太玄神功、太極拳、千手如來掌、七傷拳、天山六陽掌……基本上你叫得出嘅武功,大部分都可以喺遊戲當中搵到兼學到,身為一位武俠小說粉絲,重有啲咩可以畀「萬千絕學在一身」更加興奮?當然啦,玩過(爆過)《金庸群俠傳》嘅朋友都一定知道,呢隻遊戲最強嘅絕學,就係遊戲嘅原創招式--「野球拳」。

穿越遊戲始祖

【有種遊戲叫金庸(中)】 一直被模仿從未被超越 PC上最經典嘅武俠遊戲《金庸群俠傳》

今時今日,唔少影視作品同遊戲都好鍾意採用穿越劇情,即係喺現代嘅主角因為某某原因,穿越時空回到過去。呢種劇情喺今日睇嚟冇咩特別,但喺20年前則非常罕見,但《金庸群俠傳》正正就係一部穿越遊戲!故事講述主角喺一個生活喺20年紀嘅小宅宅,有一日喺屋企打電腦,打打下唔知咩原因,就畀部電腦吸咗入去遊戲世界入邊,而呢個遊戲世界就係《金庸群俠傳》,主角從此踏上闖蕩江湖之旅。

同人作品延續神作傳說

【有種遊戲叫金庸(中)】 一直被模仿從未被超越 PC上最經典嘅武俠遊戲《金庸群俠傳》

雖則呢隻Game從未推出過續作(唔計精神續作啦,整呢隻Game嘅「河洛工作室」之後重推出過好幾款武俠遊戲),但佢嘅生命周期非常之長,除咗因為隻Game本身好玩,一眾玩家經常拎返出嚟重溫同討論之外,重因為呢隻Game經常被「重製」,呢度所指嘅重製唔係講緊官方重製,而係好多Fans以同人之名對隻Game進行重製,最簡單就係以MOD形式改下劇情,改下招式咁,比較出名嘅MOD就有「金庸群俠前傳」、「蒼龍逐日」、「鄉民闖江湖」等等,亦有技術含量比較高嘅粉絲試過用唔同嘅製作工具延續《金庸群俠傳》嘅故事,為呢隻遊戲推出過「同人續作」。

【有種遊戲叫金庸(中)】 一直被模仿從未被超越 PC上最經典嘅武俠遊戲《金庸群俠傳》

《金庸群俠傳》推出之後,好多廠商都嘗試模仿佢嘅成功元素,複製過好多「乜乜乜乜傳」,但從未有一部嘅聲望高得過《金庸群俠傳》,時至今日,就算經過過好多「後起之秀」嘅挑戰,但如果要問邊隻金庸遊戲最好玩,仍然有一大班資深玩家會話你知「最經典嘅一定係《金庸群俠傳》」,所謂經典,就係經歷完歲月洗禮,依然有永不止息嘅生命力。如果一生人只能夠玩一部金庸小說改編嘅遊戲,我會毫不猶豫推薦你玩呢一部--《金庸群俠傳》。