鑑古通今,一起回味每段遊戲浪漫史。
為大家帶來打機及動漫資訊。
【有種遊戲叫金庸(下)】 Online Game最輝煌年代
11月05日

【有種遊戲叫金庸(下)】 Online Game最輝煌年代 《金庸群俠傳Online》

上回提要:
(上集) 香港有份製作 初代PS中文遊戲先驅
(中集) 一直被模仿從未被超越 PC上最經典嘅武俠遊戲

第一、二集分別同大家介紹過家用機同PC平台上最經典、最具代表性嘅單機金庸遊戲,最後係時候要講下Online Game。以金庸小說為主題嘅線上遊戲其實都為數唔少,只不過大多都好短命,呢個並唔係題材嘅問題,而係近年Online Game嘅通病嚟,隨住線上遊戲越出越多,加上「速食文化」盛行,玩家們換Game嘅速度亦都越嚟越快,同單機Game唔同,就算全世界得返你一個玩,只要隻Game好玩,你都可以玩落去,但係Online Game「冇人玩」就變死城,之後可以直接執笠,就算隻Game幾好玩都冇用,唔計一啲好出名嘅一線作品,近年唔少Online Game都係得幾個月貨仔,但有一隻以金庸為題材嘅Online Game,自2001推出以嚟,經過咗無數風雨、改版、復刻、復活,喺17年後嘅今日,都重有更新,重營運緊,仍然屹立不倒。

I:\To August\New\Game\Article\金庸群俠傳Online

Online Game最輝煌嘅年代

《金庸群俠傳Online》生於2000年代初,當年佢嘅主要競爭對手係初代《天堂》、《龍族》、《仙境傳說》等遊戲,全部都係比較早期嘅一線Online Game,嗰陣嘅線上遊戲冇「商城」概念,冇「免費制」,想玩嘅朋友一係畀月費,一係畀點數,講到畀點數,可能有啲朋友會比較陌生,所謂嘅點數並唔係用點數換道具,而係用點數換上線時間,當年打Online Game,除咗可以畀月費包月,重可以畀點數包小時,以《金庸群俠傳Online》為例,最低消費係兩粒鐘,所以當年打Online Game嘅朋友大多都比較認真,真係秒秒鐘都係錢,再加上嗰陣嘅遊戲選擇唔太多,令到同一隻Game嘅玩家人數比較多,而「人氣」一直都係Online Game好重要嘅元素,越多人玩,啲人就會越想玩,之後又會更多人玩,以上種種原因令到當年嘅Online Game嘅生命周期比近年嘅長好多。

同頭先提過嘅《天堂》、《龍族》、《仙境傳說》等遊戲唔同,《金庸群俠傳Online》係一款以中文為第一語言嘅Online Game,由台灣公司「中華網龍」自家製作,當年韓國嘅Online Game可謂壟斷咗成個業界,要出一隻以中文同埋中國文化為本位嘅遊戲,其實相當困難,而且重因為文化差異唔一定能夠外銷,然而《金庸群俠傳Online》憑住佢獨特嘅遊戲設計,加上深厚嘅金庸小說背景設定,當年一直都喺大中華地區穩佔前排位置,玩家人數亦一直高企。

【有種遊戲叫金庸(下)】 Online Game最輝煌年代 《金庸群俠傳Online》

超越時代嘅高自由度

就算用今日嘅眼光,《金庸群俠傳Online》嘅自由同開放程度仍然好高,玩家會喺遊戲中自創一個角色,然後闖蕩江湖,中途你可以自行選擇要加入嘅門派,學習你想學嘅武功,咁當然唔同武功都有門派限制啦,例如你要學華山劍法,就一定要拜入華山門下,要學玉女心經,就要入古墓派,之不過呢隻Game亦有「叛派」呢個選項,你可以透過一啲極端方法,嚟學超過一個門派嘅武功。遊戲中嘅「武學系統」亦同一般Online Game衝技能有啲唔同,喺武俠世界入邊,你除咗要有好嘅「外功」即係好似華山劍法、太極拳等等,亦需要有相應嘅「心法」輔助,例如玉女心經、紫霞神功等等,如果想移動時行遠啲,咁就要升下「輕功」啦。

【有種遊戲叫金庸(下)】 Online Game最輝煌年代 《金庸群俠傳Online》

《金庸群俠傳Online》嘅「升Lv」方法亦頗為特別,隻Game嚴格嚟講係冇角色等級,有嘅只係「實戰經驗」同「武功等級」,升級方法就係不斷打怪取得點數,我哋叫呢個行為做「打點」,然後再拎呢啲點數去搵相應嘅師傅「消點」,即係用點數換等級,如果教你個師傅只可以教到你80級,咁80級以後,你就要「自修」,相比起正常「消點」自修係一個非常漫長嘅過程,所以就造就咗一班玩家「掛機自修」。

【有種遊戲叫金庸(下)】 Online Game最輝煌年代 《金庸群俠傳Online》

遊戲中亦有「攻城戰」,玩家可以自組公會參與定期嘅攻城戰,攻下城池就可以獲得相應嘅特殊裝備。而本作亦有類似近代Online Game嘅任務系統,只係呢隻Game本質上都係靠打點嚟升級,而任務大多只係用嚟解鎖新武學或者玩味性質為主。《金庸群俠傳Online》嘅製作系統喺當年嚟講亦相當複雜,以整一件衫為例,你需要先有「打獵」技能打到啲原材料返嚟,再用「紡織」加工,最後交畀「裁縫」製作成裝備,而且唔一定成功!好多時你花咗勁耐時間收集同加工嘅材料,可能會因為最後一步失敗而付之流水,從某程度嚟講,《金庸群俠傳Online》都係一隻幾Hard Core嘅Online Game,不過亦正正係咁,呢個線上江湖先至嚟得更有血有肉,大家先玩得更投入、更認真。

勇敢掛下去 大俠就是你

如果要問《金庸群俠傳Online》點解會逐漸冇人玩,主要原因得一個,就係外掛!當年唔少Online Game都有外掛問題,但《金庸群俠傳Online》可謂係最嚴重嘅一隻,基本上十個玩家有七、八個都係用緊外掛,外掛可以幫你自動打點、消點,升製作技能,甚至偷學武功,而打點過程本身嘅重複性實在太過高,太過悶,基本上你就係不斷喺同一個地方遇敵,出同一招,殺完再遇敵,無限Loop,令到好多玩家頂唔順,加上外掛又容易取得(當然好嘅外掛係要畀錢),官方捉外掛態度又非常消極,令到外掛橫行,甚至喺玩家之間出現咗一句口號叫「勇敢掛下去,大俠就是你」,其普及程度不言而喻。雖然外掛係好方便,但同時亦都加速咗呢隻遊戲走向滅亡,加上越嚟越多Online Game推出,玩家人數驟降,《金庸群俠傳Online》亦因此逐漸敗亡。

【有種遊戲叫金庸(下)】 Online Game最輝煌年代 《金庸群俠傳Online》

「老兵不死,只會慢慢的凋零而已」係《金庸群俠傳Online》最佳寫照,雖然玩家人數不斷下降,但其實隻Game從未「完全消失」過,網龍基本上每過一段時間,就會推出一隻復刻版,不論係「至尊版」又好,「經典版」又好,每次一開始都會有一大班玩家回鍋,然後又再慢慢凋零,呢隻Game最近先喺2017年有過一次大型更新叫「武林至尊」,以一隻2001首發嘅古老Online Game嚟講,十幾年後都重有大更新,重有玩家肯返去玩,已經係一種成就。

【有種遊戲叫金庸(下)】 Online Game最輝煌年代 《金庸群俠傳Online》

或者大家重願意返去玩,在乎嘅並唔係遊戲本身,而係曾經嘅回憶,關於嗰個最簡單、最美好、最壞嘅輝煌年代嘅美好回憶。