每周遊戲熱話,Game壇最新動態,即時為你放送。
為大家帶來打機及動漫資訊。
《爐石戰記》個Friend? 《Dota 2》推全新卡牌遊戲
11月21日

《爐石戰記》個Friend? 《Dota 2》推全新卡牌遊戲

繼《爐石戰記》大成功之後,Game界好似都出現咗一波卡Game熱潮,近日亦有唔少大作額外推出一啲外傳形式嘅卡牌遊戲(例如《巫師》系列嗰隻《昆特牌》),而《Dota 2》亦都好似想食住個勢,由Valve牽頭,同著名卡Game遊戲設計師Richard Garfield合作打造而成嘅全新卡牌遊戲《Artifact》正式喺最近展開公開測試。

《Artifact》係以《Dota 2》嘅故事同角色作為背景延伸而成嘅外傳式卡牌遊戲,同《爐石戰記》類似,都係主打1對1嘅單挑對戰,而且本作亦有套用返《Dota 2》個MOBA設定,你嘅目標都係推塔,只係透過卡牌去完成任務,玩家需要喺遊戲一開始嘅時候選定一位《Dota 2》嘅英雄作為主角色,然後喺卡盤上嘅三路配置唔同嘅卡牌,進行「推塔」。

《Artifact》雖然係卡Game,但雷隊長試玩完,MOBA味好濃烈(唔係講緊玩法,係個設定同感覺),都算幾有新鮮感,本作暫時係PC限定,而正式版就會喺11月29日上市,而家就公測緊,有興趣嘅朋友記住上返Steam平台望下啦。