當打機動漫成為了生活的一部分,絕對會為日常增添不少趣事。
為大家帶來打機及動漫資訊。
遊戲改編真人電影 最新芒亨劇照流出
11月21日

遊戲改編真人電影 最新芒亨劇照流出

早前同大家介紹過《魔物獵人(Monster Hunter)》正式開拍真人版電影,但內容係點,劇情係點,甚至乎演員造型等等全部都係Top Secret,令到唔少芒亨粉絲都要抱住既期待又怕被傷害嘅心情,原因好簡單,大部分由遊戲改編而成嘅真人電影,大多都冇乜好下場,一係就拍咗套戲出嚟同原作落差太大,除咗個名其他嘢冇乜連結,再唔係就係「魔改」劇情,用所謂嘅改寫方法摧毀原作!

要數到被「魔改」得最犀利嘅真人電影,一定非《生化危機》系列莫屬,由Milla Jovovich主演嘅《生化危機》電影至今推出咗六集,基本上已經同原著冇乜關係,甚至被唔少原著死忠批評為掛羊頭賣狗肉之作,而今次嘅《魔物獵人》真人版電影,好死唔死個主角又係Milla Jovovich,最慘係連個導演都一樣係《生化危機》嗰位Paul Anderson(題外話:Milla Jovovich其實就係Paul Anderson老婆),難怪啲Fans咁緊張嘅!

遊戲改編真人電影 最新芒亨劇照流出

根據最新釋出嘅資料,《魔物獵人》真人版電影將會係一部穿越劇,故事講述原本喺現實世界生活嘅男女主角因為某啲原因,被傳送咗去異世界,而主角團隊就要同異世界嘅夥伴合作討伐當地嘅魔物,冇錯,聽落一啲都唔芒亨!而呢張最近先至流出嘅劇照就進一步為大家揭開咗主角嘅電影造型,喂!大佬做乜把大劍咁細把嘅?縮咗水啵!

睇完呢張劇照,各位獵人對呢套電影重抱唔抱有期望呢?