當打機動漫成為了生活的一部分,絕對會為日常增添不少趣事。
為大家帶來打機及動漫資訊。
立即聯署 助82歲遊戲主播變NPC
12月05日

立即聯署 助82歲遊戲主播變NPC

唔好以為打機一定係年輕人嘅專利,其實有唔少老友記都好熱愛遊戲,近年更加有「銀髮電競隊」出現,外國亦有唔少長者鍾情於直播打機,其中現年82歲嘅Shirley Curry就係喺健力士世界紀錄認證下,最年長嘅遊戲YouTuber,嗱嗱嗱!千祈唔好以為Shirley咁大年紀反應一定好慢,或者只打啲靜態Game,其實Shirley最鍾意,最熱衷玩嘅遊戲,就係《上古卷軸(The Elder Scrolls)》系列,雖然已經82歲,但係Shirley殺怪絕不手軟,重玩得好Hyper,而最近佢就多次表示,好期待《上古卷軸》第六代嘅推出,雖然開發商Bethesda表示《上古卷軸6》已經仍處開發階段,但最快都應該要5、6年後先正式推出到。

Shirley早前喺佢嘅頻道表示,如果真係要6年,到時佢已經88歲,擔心自己未必可以喺有生之年玩到呢款遊戲嘅續作,雖然只係短短嘅一句說話,但就引起咗無數玩家嘅共鳴同感嘆,更有人因此發起聯署,希望開發商Bethesda可以將Shirley變身成遊戲NPC,喺《上古卷軸6》中登場,以「不滅」嘅狀態,長存喺佢最心愛嘅遊戲當中。

相關請願訊息已經正式登上咗請願網站「Change.org」,去到呢刻有超過3萬6千人留咗名支持,其實Bethesda之前都做過類似嘅事,當時有位熱愛Bethesda遊戲嘅粉絲叫做Erik West,佢後來不幸因絕症離世,Bethesda就將佢幻化成遊戲中嘅NPC,並取其名為「Erik the Slayer」,所以如果聯署人數夠多,呢件事絕對可以成真,想幫Shirley出一份力嘅朋友快啲去聯署啦!

聯署傳送門