要判斷一隻Game好唔好玩，受唔受歡迎，除咗可以睇各大平台嘅評測同分數之外，最實際就係睇多唔多人玩，衰啲咁講，分數同評測都有得做假，但係口碑、銷量呢啲嘢就冇得呃，一般而言，如果一隻遊戲真係好玩，佢應該會經得起「時間嘅考驗」，會越嚟越多人玩。最近就有玩家透過「逆向計算」嘅方法，搵到每隻PS4遊戲嘅「真實遊玩人數」，重自製咗個遊戲資料庫，公開畀全球玩家睇，各位買Game前，不妨可以拎住做參考。

早前Sony整咗個「My PS4 Life」活動，可以幫玩家總結PSN帳號入邊嘅數據，其中包括自己拎咗啲咩獎盃、全球有幾多人拎過相同獎杯、全球有幾多百分比嘅人拎咗呢個獎盃等等，而根據雷隊長喺小學學過嘅數學得知，當你有「全球百分比」同埋「全球有幾多人拎咗呢個獎盃」兩項數據，就可以逆向計算到實際有幾多人玩過呢隻遊戲，舉個例子，某獎盃全球有80萬人拎過，而拎到嘅百分比係40%嘅話，將80萬除以40%，就可以得出總共有200萬人玩過呢隻Game嘅結果。

有玩家就用呢個「漏洞」自行建立咗一個遊戲資料庫，公布各款遊戲嘅真實玩家數目，暫時全球最多玩家玩嘅PS4遊戲係《GTA5》，總玩家數目有近5千6百萬人，呢個資料庫係免費公開嘅，亦會Keep住Update，雖然並非百分百準確，但有極高嘅參考價值，有興趣嘅朋友可以去觀摩下。

【資料庫傳送門】