睽別咗四年，「割草無雙」最極致嘅系列作《無雙OROCHI蛇魔3》終於正式現身。眾所周知，「無雙」系列最出名就係《真‧三國無雙》同埋《戰國無雙》，而呢隻蛇魔就係集兩家之大成，將全部人物，唔理時空，唔理劇情，全部塞哂落同一部作品入邊，可謂係「炒埋一碟遊戲」嘅終極代表，開發商「光榮特庫摩」日前就公佈咗少少《無雙OROCHI蛇魔3》嘅最新情報，呢隻Game不嬲都鍾意用人數嚇窒人，見到果張密密麻麻嘅角色圖，Errrrr….老實說大家又認得幾多個呢？講到一半當你贏啦！

官方大大力咁宣傳今集登場角色將達到170人，除咗用人數先聲奪人之外，光榮仲透露咗少少劇情，其中就係「宙斯」將會成為今集嘅關鍵角色，你冇睇錯我無打錯阿，係希臘神話果個宙斯阿，因咩事三國時代嘅英雄同日本戰國嘅武將要向希臘嘅「神」挑機呢？記住留意我哋嘅後續報導啦！