1969年,Ralph Baer試玩「Brown Box」嘅畫面
你有機打全靠佢 電子遊戲機之父--Ralph Baer

眨吓眼又嚟到八月最後一個禮拜,亦意味住一啲都唔漫長嘅暑假即將完結(一眾打工仔表示:而我不知道甚麼是暑假……),暑假對好多人嚟講就係打機嘅季節,係可以日夜顛倒無休止瘋狂打機嘅時間,但各位機迷喺享受遊戲樂趣嘅時候,又有冇諗過到底呢份咁直感又刺激嘅愉悅,到底係邊位偉人帶比我哋嘅呢?或者「邊個發明了返工」呢個問題我哋永遠都唔會搵到答案,但係對於「邊個發明了打機」呢條問題,「你想知道答案嗎,我現在就可以告訴你。」(請自行腦補沈佳宜Tone)八月最後一個星期,喺我哋默默送別暑假嘅同時,亦借呢個機會憑弔一下呢位帶比無數機迷萬千幸福嘅偉人--Ralph Baer。

Ralph Baer與「最初的遊戲」
Ralph Baer與「最初的遊戲」

Ralph Baer出生於1922年嘅德國,擁有猶太血統,而因為咁喺當時嘅德國被排斥並且踢出學校,去到1938年,Ralph逃難到美國,佢做過一段長時間嘅工廠工作,亦喺二戰嘅時候被徵召入伍,戰後拎住一筆嚟自政府嘅軍人援助完成咗佢嘅電視工程學學位,之後就加入咗唔同嘅電子公司擔任高級工程師。

現代電子遊戲機前身Brown Box
現代電子遊戲機前身Brown Box

去到1960年代,當時電視機喺美國開始普及,Ralph就覺得電視機應該要有啲娛樂元素,喺大部分人都唔睇好嘅情況下(嚴格嚟講係大家都唔知佢想點,因為當時未有「遊戲機」呢個概念),Ralph拎住少量開發資金開發出一部名為Brown Box嘅「電視盒」,只要將呢個「電視盒」連接好電視機,再插埋隨盒附送嘅兩個控制器,電視畫面就會出現一條白線分開左右兩邊,然後中間就會出有個白點向左右兩邊彈嚟彈去,玩家就可以透過控制器控制相應嘅遊標去打擊果個白點,相信好多朋友睇到嚟到都會不約而同咁諗起一隻經典遊戲Pong,的而且確,呢隻Brown Box上嘅無名遊戲,就係遊戲史上第一部街機遊戲Pong嘅原型。(事後Pong嘅製作公司Atari亦因為咁被控侵權要賠錢)

經典遊戲Pong

歷史上第一部家用電子遊戲機「Magnavox Odyssey」
歷史上第一部家用電子遊戲機「Magnavox Odyssey」

之後Ralph同一間名為Magnavox嘅公司簽約,以Brown Box為藍本改良並量產化,推出咗歷史上第一部家用電子遊戲機--Magnavox Odyssey,正式奠定咗何謂「電子遊戲(Video Game)」。喺Magnavox Odyssey面世之前,世界上冇一個清晰關於電子遊戲嘅定義,亦冇家用電子遊戲機呢樣產物,我哋絕對可以話Ralph Baer改變咗世界,改變咗好一代人,至少,佢改變咗我哋,改變咗每一個打機嘅我哋。