遊戲界都市傳聞 傳說中被詛咒嘅遊戲
遊戲界都市傳聞 傳說中被詛咒嘅遊戲

經歷咗多次延期,開發完成後又再進行二次開發,由PS3平台推出變到直接登錄PS4平台,又再改埋名,《絕體絕命都市》系列正統續作第四集,終於以《絕體絕命都市4 Plus -夏日回憶-》之名,預定喺今年10月25日正式登錄PS4平台,正當眾粉絲們以為呢隻事隔7、8年,歷盡千萬苦難先推出到嘅「傳奇遊戲」實食冇黐牙之際,「可能會再次延期」嘅傳聞又再喺網絡上流傳,並且連同《絕體絕命都市》系列嘅「詛咒傳說」都畀日本玩家挖返出嚟講,到底呢個「詛咒傳說」係啲乜嘢,且看下文娓娓道來。

喺遊戲圈,有一部題材頗為獨特嘅遊戲作品叫做《絕體絕命都市》,呢個系列雖然講唔上係咩一線頂級作品,但都叫做略有名氣,而且因為取材特別同埋尚算唔錯嘅品質,都儲落一大班粉絲。本系列以受到天災影響而崩壞嘅大都市作為舞台,玩家需要喺遊戲中同剩低落嚟嘅倖存者互相合作生存落去。系列至今已經推出咗三集,分別係《絕體絕命都市》、《絕體絕命都市2:冰凍的記憶》同埋《絕體絕命都市3:步向毀壞的城市與少女之歌》,早前亦推出咗另一隻姊妹作品《巨影都市》,主要講述日本被巨大怪物襲擊時,小市民走佬逃命嘅生存冒險遊戲(不過呢集嘅評價非常麻麻)。

唔計姊妹作,本傳就已經出咗三集,而本傳續作《絕體絕命都市4》其實早喺2011年左右已經開發完成,重準備好推出,但最後就突然被剎停,大家翻查返2011年日本發生過咩事就一定會搵到個原因--311大地震,呢場被喻為係日本近代史上其中一次最大型嘅災難直接剎停咗《絕體絕命都市4》,發行商當時都講得好明白,事關第四集就係講述主角所在嘅大都市面對史無前例嘅大地震,喺極惡劣嘅環境下諗盡辦法逃走同埋生存落去,為咗唔想令大家觸景傷情,喺發表咗「自主規制」聲明之後,呢隻Game就被暫時擱置。

雖然理性話畀大家知大地震同隻Game嘅發行係冇任何關係,但都市傳聞往往就係咁樣出現,一傳十,十傳百,逐漸越嚟越多人將兩件事擺埋一齊,重出現咗好多黑暗嘅說法,又話咩隻Game受到詛咒,呢隻係咩咩黑魔法之Game等等,之後《絕體絕命都市4》亦因為咁一再延期推出,最後重被取消埋發行計劃,跟住又有好多關於開發團隊問題同版權爭議輪住出現,擾攘咗好耐,《絕體絕命都市》之父,亦即係本遊戲嘅原製作人九條一馬終於完整取回該作版權,並且自行成立新公司「Granzella」準備有關發行工作,佢重講到明無論點都唔會放棄呢部作品,一定會將佢推出市場。消息一出亦有啲網民反對,話呢個「逆天而行」嘅舉動會招致另一場災難嘅發生。《絕體絕命都市4》原本計劃喺PS3發行,但經歷咗多次延期之後,開發小組決定對續作進行「再開發」,並搬到PS4上推出,經過一段長時間嘅努力之後,開發小組終於喺今年年中宣布《絕體絕命都市4》會正式喺2018年10月25日面世,有關嘅試玩版早前亦已被釋出,當時網絡仍然廣泛地流傳住「詛咒論」。

「好嘅唔靈醜嘅靈」,近日日本不幸地遇上25年來最強颱風「飛燕」,強烈熱帶氣旋正面吹襲日本四國、關西等地,廣為香港人熟悉嘅大阪、京都都成為咗重災區,其中作為關西地區與外國連繫最主要橋樑嘅關西國際機場更加持續水浸,而連接機場嘅唯一大橋亦係風災當中嚴重損毀,關西地區嘅國際航道因此完全停哂。禍不單行嘅係,呢邊箱西日本被強風摧殘,救災工作尚完全展開,北海道嗰邊又不幸地遇上6.7級地震,有多處房屋倒塌之餘,核電站亦受到嚴重影響,北海道幾乎全面停電,近300萬人受災,新千歲機場亦收到嚴重損傷報告,全面停止運作。唔少網民嘗試將天災同《絕體絕命都市4》扯上關係,更有網民亦留言表示「如果真係關事,唔會單只係打風,應該係地震」(因為第四集係講述地震災後嘅世界),而喺大風災之後,居然真係咁不幸遇上強烈地震,令到呢個「都市傳聞」再度被廣泛流傳,更加有唔少人質疑,Granzella係咪應該好似當年嘅發行商咁,緊急剎停新作推出。然而,回歸理性,呢一刻最重要嘅唔係隻Game出唔出到,亦唔應該討論任何嘅怪力亂神之說住,最重要都係盼望救災工作可以順利展開,希望當地居民可以平安度過,盡快從無常嘅災害中恢復過嚟。