四人混戰「殺人棒球」 假打波 真打人
四人混戰「殺人棒球」 假打波 真打人

近年遊戲界進入百家爭鳴局面,3A大作當然有唔少耐玩作品,但其實好多獨立工作室嘅自家製Indie Game質素亦都唔差,好似呢隻由荷蘭獨立團隊打造嘅《Team Reptile》系列就好值得推薦畀大家。如果各位唔夠留心睇佢哋嘅宣傳片,好可能會以為呢隻係一隻格鬥遊戲嚟,但睇真啲,會發現呢班「打緊交」嘅人,其實真係打緊棒球。

《Team Reptile》最早係2014年面世,呢隻Game喺玩家之間嘅評價非常之高,喺Steam平台有95%玩家比咗好評,綜合所有評論等級係最高級別嘅「壓倒性好評」。遊戲玩法非常獨特,你嘅目標得一個,就係擊倒所有對手,但玩家並唔可以對敵人作出直接攻擊,基本上大部分角色手上都會有一枝球棒,玩家需要透過打中個波,再配合埋各式各樣嘅特技去為對手帶嚟傷害,從而擊敗對手。簡單啲講,就係表面打波,暗地裡為打人。

遊戲靠住非常獨特嘅玩法,同埋極度爽快嘅節奏,喺短時間內吸引到一大班粉絲,亦成功喺Indie Game界打響名堂。時隔四年,官方終於推出名為《Lethal League Blaze》嘅「殺人棒球」續集,遊戲預定會登上PS4、Xbox One、Switch同埋PC平台,主機版本預計會喺2019年推出,而PC版本就會搶先喺10月25日面世,遊戲支援最多四人同時對決,有望問鼎下一屆友情破壞遊戲之王嘅寶座!