邊殺喪屍邊食雞 《垂死之光》推全新多人遊戲
邊殺喪屍邊食雞 《垂死之光》推全新多人遊戲

喪屍遊戲大行其道,食雞Game嘅風潮亦勢不可擋,假設你係開發商,而家要整一款新嘅生存射擊遊戲,你會點做?正如一代巨星史提芬周咁講「爭咩吖,兩樣溝埋變做瀨尿牛丸吖笨」,《垂死之光(Dying Light)》系列開發商今次就學到嘢啦,將殺喪屍同食雞溝埋一齊,推出全新作品--《垂死之光:壞血(Dying Light: Bad Blood)》。

新作嘅戰鬥風格非常爽快,除咗保留咗原作嘅經典Parkour(跑酷)風格外,亦將原有嘅遊戲主軸殺喪屍(PVE模式)同食雞(PVP模式)完美結合。玩家需要喺多人戰場上邊殺喪屍取得武器同埋資源,另一邊對抗同喺玩家嘅人類敵人,打低晒其他玩家成為戰場上為一嘅倖存勝利者。

根據官方資料顯示,《垂死之光:壞血》嘅正式版本將於2018年年底或者下年年頭推出,但心急嘅玩家而家呢刻已經可以上Steam平台玩住「先行體驗版」先,雖然叫做「先行體驗版」,但大部分功能都已經開放咗,在線人數亦非常多唔使點等都開到局,咁當然重有少量Bug啦,但可以率先試玩,重等咩先?