Switch日系RPG神作 《異度神劍2》推獨立資料片
Switch日系RPG神作 《異度神劍2》推獨立資料片

被唔少玩家吹棒為「到呢刻為止Switch上最好玩嘅日系RPG遊戲」--《異度神劍 2(Xenoblade 2))終於推出續集啦,更確切嚟講應該係超大型資料片先至啱,就算各位從未接觸過呢個系列都應該留意下,因為呢隻名為《異度神劍 2:黃金之國伊拉》嘅新作,除咗係大型資料片之外,重係一隻「獨立資料片」,即係唔使擁有原作都玩得,嚴格嚟講的確係一隻新作無誤。

《異度神劍 2:黃金之國伊拉》將講述遊戲本傳五百年前嘅前傳故事,以本傳中嘅重要角色「真(シン)」作為遊戲主角。《異度神劍》系列其中一個最吸引人嘅地方,就係系列作擁有廣闊而無縫連接嘅地圖,新作同樣會繼承呢樣優點,而且唔係單純翻用本傳嘅「剩餘資源」,而係會重新打造一幅全新地圖,配上新故事、新系統畀玩家盡情冒險。

可能唔少朋友都聽過《異度神劍 2》嘅大名,但未玩過前作,今次確實係一個非常好嘅入坑機會,因為今次係前傳性質,就算從未接觸過前作,都可以直接玩新作,劇情上冇太多銜接上嘅考慮(當然玩過會對部分角色關係更投入啦),而且新作除咗係《異度神劍 2》嘅DLC、季票內容之外,亦可以獨立遊玩,可供獨立遊玩嘅實體版遊戲將會喺9月21日推出。