「Nintendo Switch Online」開催 一文睇晒值唔值畀錢
「Nintendo Switch Online」開催 一文睇晒值唔值畀錢

自推出以嚟,Switch平台上網聯機一直都係免費嘅,但以後就冇呢枝歌仔唱啦,隨住「Nintendo Switch Online」服務正式展開(今日9月19日上線),以後要使用相關嘅網絡功能,就要先畀錢買「Nintendo Switch Online使用券」先用得到,情況有啲似Xbox系列嘅「金會員」或者PS系列嘅「PS Plus會籍」。

咁到底所謂嘅相關網絡功能包括啲咩,有乜嘢服務或者功能係要畀錢先用到呢?Join咗呢個plan又有咩其他福利?小編同大家大致列晒出嚟:

1. 網絡連線對戰

以後要連機合作或者對戰,只要係用網際網絡連線(唔計面連),唔理你係咩Game,一律都要畀錢Join咗「Nintendo Switch Online」先連得到。

「Nintendo Switch Online」開催   一文睇晒值唔值畀錢

2. 遊戲存檔雲端備份

Switch個遊戲存檔備份功能一直都為人垢病,廢無可廢,同唔存在冇咩分別,但「Nintendo Switch Online」推出咗之後,用戶可以將部主機嘅遊戲Save擺上雲端,多一層保障。但係必須留意一點「魔鬼在細節」,因為官方冇講明如果你唔續會員,啲Save會唔會保留,有唔少資深玩家亦推測,只要你一唔續個會員資格,雲端上嘅Save就會喺短時間被清除,呢個風險各位要多加留意。

「Nintendo Switch Online」開催   一文睇晒值唔值畀錢

3. 免費遊戲

同Xbox One、PS4一樣,只要畀咗錢,官方會定期送出一啲免費遊戲,現時只要Join咗「Nintendo Switch Online」,就可以唔使錢玩到好多復古FC遊戲,如果你係資深任記粉絲,呢點絕對值回碼價。

「Nintendo Switch Online」開催   一文睇晒值唔值畀錢

4. 對應專用手機APP

呢點其實廢廢地,簡單講就係你可以用手機APP管理「Nintendo Switch Online」帳號,用途不大。

「Nintendo Switch Online」開催   一文睇晒值唔值畀錢

5. 會員限定特典

任記應該會持續推出一啲會員限定特典,包括實體同非實同嘅,非實體就好易理解啦,就係遊戲入邊嘅特殊服裝或者道具,再唔係就特別Skin等等,而實體特典呢,老任暫時就推出咗一套紅白機造型嘅Switch專用手掣(定價5980日元),外型的確幾吸引,但要買呢件配件,你首先就要Join咗「Nintendo Switch Online」先,唔係會員唔買得,相信往後會有更多類似嘅特典推出。

「Nintendo Switch Online」開催   一文睇晒值唔值畀錢

講咗咁耐大家最關心應該係收費,以個人會員為例,一個月要300日元,三個月就800日元,一年就2400日元,換算翻即係:

1個月=約港紙21蚊
3個月=約港紙58蚊
1年=約港紙172蚊

如果係家庭會員就一年4500日元,即係大約港紙323蚊,最多支援8個不同帳戶(位於同一個家庭群組)共同使用服務。

「Nintendo Switch Online」開催   一文睇晒值唔值畀錢

值得唔值得Join「Nintendo Switch Online」?綜合而言,最有用嘅功能其實得一個,就係線上遊戲資格,雲端備份同免費遊戲當係送嘅,最後嗰兩個功能真係可有可無,所以如果你熱愛網上對戰,唔使諗,畀錢啦!如果唔上網玩嘅,就可以等到需要時先再買都未遲。