終極復刻回憶 初代PS復古機
終極復刻回憶 初代PS復古機

初代PS機係Sony初次踏入遊戲界嘅起點,亦係其中一部遊戲史上最重要嘅家用主機,無數當年嘅新元素,好似光碟載體同埋3D遊戲等等,都係靠呢部主機發揚光大,PS1奠定咗Sony遊戲一哥嘅地位,亦係全球第一部銷量破億嘅家用機,呢部代表住好多朋友童年回憶、喺遊戲界有舉足輕重地位嘅傳說級主機,終於都要推出限定復刻版啦!

繼SEGA、SNK、任記等大廠先後推出完「迷你版復刻主機」之後,終於輪到罪犯滔天嘅Sony出手,喺TGS2018前夕投下呢一個令無數老玩家振奮嘅好消息--採用原本造型,以全新技術打造嘅「PlayStation Classic」即將於12月全球同步發售。呢部「新主機」同原主機相比細咗好多,一隻手拎得起,隨機將配備兩個復古手掣,採用HDMI輸出接口,可以最高輸出720p影像訊號。

「PlayStation Classic」將內建20款遊戲,其中包括《Final Fantasy VII》、《Jumping Flash!》、《R4 RIDGE RACER TYPE 4》、《Tekken 3》、《Wild Arms》等等,據官方資料顯示,呢五款遊戲係「必備遊戲」,乜區嘅機都一定有,而另外大約15款遊戲,則視乎地區(主機版本)有所不同,目前重係一個謎(但亦令人好期待)。

「PlayStation Classic」將於12月3日,亦即係原版PS1上市24週年紀念日正式面世,港版行貨定價為$798,數量有限,相信會有炒價,有興趣嘅朋友可以考慮下預訂啦!