中二病必玩 《永恆的盡頭》4K重製 
中二病必玩 《永恆的盡頭》4K重製

又一隻曾經嘅經典加入重製行列,今次輪到《永恆的盡頭》(END OF ETERNITY),呢隻曾經喺2010年推出過嘅極具特色戰略遊戲即將以高清4K重製登錄次世代主機平台。呢隻Game當年係一隻全新作品,冇前傳背書,但憑住其獨特玩法好快就喺玩家中間取得非常高嘅評價。

《永恆的盡頭》係一隻戰略遊戲,大致上係回合制,但唔好以為係戰略Game節奏就一定慢,呢隻作品嘅出招過程爽快到你唔信,遊戲主角們以槍械作為武器,每次出招都「中二」到爆,扣一下板機可以通常開三四粒子彈,而且啲槍造型亦都非常「中二」,爽度滿分,如果要用一隻遊戲作類比,小編會形容佢係類似《戰場女武神》嘅戰鬥系統,不過節奏快好多倍。除此之外,《永恆的盡頭》最吸引人嘅地方,一定係女主角嘅人設同埋極度豐富嘅紙娃娃系統,遊戲中嘅角色上至服裝、髮型、髮色,下至配飾、手套、鞋等等,全部都可以隨意更換,加埋少女同槍械配搭而成嘅反差萌,冇得輸。

遊戲講述喺未來世界,因為開發過度同埋環境污染問題,地球走向衰敗嘅邊緣,人類亦到有滅亡嘅危機,為此倖存嘅人類動用大規模資源製造咗一部巨型機械--「巴賽爾(バーゼル)」,呢部嘢係一個大型環境維持裝置,以人工智能系統延長地球壽命,係人類續存嘅最後希望,但隨住故事一層一層推進,主角們嘅身世同埋「巴賽爾」背後嘅秘密都將一一呈現喺玩家面前,以爆過機嘅過來人身份同大家講聲,呢隻Game嘅劇情認真唔錯。

《永恆的盡頭4K/HD EDITION》將於10月18日登錄PS4同埋PC平台,順帶一提本作嘅日版係《永恆的盡頭》,國際版就叫做《Resonance of Fate》,但其實係同一隻Game嚟嘅,內容亦冇唔同,唯一分別係得個名,唔使驚買錯。