大量前導劇情釋出 史上最癲但丁強勢回歸
大量前導劇情釋出 史上最癲但丁強勢回歸

早前《Devil May Cry 5(惡魔獵人5)》宣布會喺下年3月推出,系列作粉絲已經High到爆炸,事關今集終於唔係「美版吸毒但丁」,而係回歸源點嘅日版DMC,按已釋出資料顯示,遊戲主角將會係大個仔咗唔少嘅尼祿(Nero),亦即係四代主角,而系列第一男主角但丁一直都只係喺宣傳片度模糊地蒲下頭,但各位但丁粉唔使再估估下啦,因為已經確認但丁都將會作為可以操控嘅角色登錄《Devil May Cry 5》,而且官方喺TGS18前多釋出嘅最新宣傳片重透露咗一大堆前導訊息,但丁嘅女伴們亦一一現身。

從最新宣傳片可以得知,有一位「畀得起錢」嘅客人以預先付款嘅形式委託咗但丁進行「某個任務」,咁肯定呢個任務一定同魔界有關啦。除咗但丁,翠絲(Trish)同蕾蒂(Lady)亦都同時登場,而且佢哋好似相處得幾融洽(但丁成功享齊人之福?),至少佢哋一定係合作關係先,而早前新出現嗰位神秘女角,即係自稱係武器製造師,同尼祿拍檔嗰位,居然話自己係Nell Goldstein嘅後代,而Nell就係但丁嗰兩把雙槍嘅鍛造者。今次片尾又多咗位神秘角色出現,是敵是友重未知,但肯肯定係串連今集劇情嘅重要角色。

另一方面新宣傳片亦示範咗更多實機戰鬥畫面,一個字--爽!但丁今集可以用電單車作為武器,一嘢車埋落敵人度,瀟灑到唔使講嘢,至於其他武器嘅使用同埋戰鬥風格,比前作更加俐落,戰鬥過場更加癲,但丁嗰種痴線個性更上一層樓,而且配上真正嘅次世代機能,畫質幾級跳,作為一隻真正嘅3A大作,絕對值得期待。

《Devil May Cry 5》暫定會喺2019年3月8日登錄Xbox One、PS4同埋PC平台,宣傳片都已經有實機中文字幕,繁體中文版實有啦!

 有興趣嘅朋友可以睇埋以下呢段痴線彩蛋,一定唔會令你失望。