四人合作殺喪屍 搶先體驗《陰屍路》改篇遊戲
四人合作殺喪屍 搶先體驗《陰屍路》改篇遊戲

喺市場上,合作殺喪屍嘅生存Game有好多款,但就唔係隻隻都好玩,重要十隻有七隻都係地雷貨色,之但係呢隻新作雷隊長就寄以厚望,主要原因有兩個......

呢隻名為《Overkill's The Walking Dead》嘅全新遊戲,係根據全球其中一套最Hit嘅美劇《陰屍路(The Walking Dead)》改篇而成,遊戲將以已經荒廢咗嘅美國華盛頓特區為主要舞台,講述世界淪陷咗之後僅剩嘅人類嘅生存故事,遊戲中至少會有四位角色登場,各個角色會有各自唔同嘅技能,玩家可以透過遊戲進程幫角色升級,透過類似技能樹嘅系統增加能力。除咗殺喪屍,搜索有用物資亦係本作重點之一,玩家需要活用各式各樣嘅道具先至可以生存落去,而唔係一味冇腦地殺喪屍,本作亦支援最多四人合作進行遊戲。《Overkill's The Walking Dead》作為如此大型嘅影視作品改編遊戲,製作方一定唔會咁輕易放軟手腳,原著版權方亦會落足力Mon到實,雷作機會大大減少。

除咗之外,本作嘅製作公司係嚟自瑞典嘅Overkill Software,亦即係開發傳奇級射擊遊戲《Payday》系列嘅工作室,Overkill Software雖然開設咗唔係好耐,亦冇太多作品(某程度嚟講得《Payday》系列同埋無限套DLC),但質素絕對有保證,你睇《Payday》有幾紅就知,所以新作出錯嘅機會亦唔會好大。

大IP加上殿堂級製作公司,《Overkill's The Walking Dead》絕對值得令人期待!而官方亦正常釋出咗封測時間表,只要預購遊戲,玩家10月就已經可以搶先喺PC上試玩到呢隻有望成為名作嘅射擊遊戲,如果唔係就要等到11月6日呢隻Game先會正式推出啦。(本作除咗PC版,亦預定會推出PS4、Xbox One版本)

PC封測時間表及詳情:http://bit.ly/2QDKQ24