完全免費獨立作品 充滿悲傷回憶嘅恐怖遊戲
完全免費獨立作品 充滿悲傷回憶嘅恐怖遊戲

前排介紹過一隻免費嘅恐怖Game《September 1999》(http://bit.ly/2C8Wden),發現唔少朋友對「免費」加「恐怖」呢兩個元素都幾有興趣,所以雷隊長今日再介紹另一隻既免費又有返咁上下質素嘅PC恐怖遊戲畀大家。

呢隻名為《Remembrance》嘅恐怖Game係一隻真真正正嘅獨立作品,成Team製作團隊員只有5個人,基本上全部都係學生嚟,而且只係用咗三個月時間進行開發工作,但出嚟嘅效果相當唔錯,雖然總遊戲流程唔算長(大約有30分鐘左右),但遊戲嘅恐怖氛圍做得相當有水準,有唔少驚嚇位之餘,亦完整交代到故事,雷隊長特別鍾意遊戲中一個「心跳系統」,當你遇到一啲驚嚇事物嘅時候,主角會因為心跳加速而出現「異樣」,而遊戲嘅畫面呈現亦非常到位地呈現到呢個情景,大大加入咗玩家嘅投入感。

遊戲主要目的係「探索」同埋「揭露」事件嘅真相,主角將會置身喺一間「無人大宅」入邊,透過喺空屋(or凶屋啦)入邊嘅移動同探索,了解恐怖現象背後嘅悲傷故事。隻Game就唔使錢嘅,所以雷隊長都唔劇透太多,自己下載嚟試玩下啦,不過先旨聲明,呢隻Game比之前介紹嗰隻恐怖,冇乜贍嘅朋友最好叫多個人陪你玩啦!