全新神秘寵物小精靈 「美錄坦」捕捉全攻略
全新神秘寵物小精靈 「美錄坦」捕捉全攻略

早前同大家介紹過,最近喺《Pokémon GO》入邊出現咗一隻全新嘅神秘小精靈,起初好多玩家以為係Bug怪嚟,但最後官方出嚟澄清呢隻係一隻特殊嘅全新小精靈唔係Bug,個名叫做「美錄坦」(詳情:http://bit.ly/2Cb99R1),消息一出,即刻引起咗各大訓練員嘅注意,好想知道點樣捉到呢隻傳說中嘅神秘小精靈,經過明查暗訪,雷隊長已經對「美錄坦」嘅生態暸如指掌,跟住以下步驟做,捕捉「美錄坦」冇難度。

官方一早暗示過捕捉「美錄坦」嘅關鍵係手遊《Pokémon GO》同埋即將喺Switch上推出嘅《Pokémon: Let's Go》嘅聯動,呢個消息同雷隊長冒死取得嘅情報不謀而合,要捉到「美錄坦」,首先你要喺《Pokémon GO》入邊取得一個叫做「神秘盒子」嘅道具,而要拎到「神秘盒子」,就需要將兩隻Game進行聯動啦。訓練員只需要同時擁有《Pokémon GO》同埋《Pokémon: Let's Go》遊戲,然後將小精靈從《Pokémon GO》傳送到《Pokémon: Let's Go》(即係手機傳送去Switch平台),《Pokémon GO》嗰邊就會拎到「神秘盒子」,之後喺手遊《Pokémon GO》中使用「神秘盒子」道具,「美錄坦」就會有機會被吸引到並且現身,之後就可以透過正常程序,即係遇怪同埋拋出精靈球嚟捕捉佢。

喺《Pokémon GO》嗰邊捉到「美錄坦」之後,相信就可以將呢隻精靈從《Pokémon GO》傳送去《Pokémon: Let's Go》當中(戴返頭盔先:始終隻Game未正式推出,所以未能測試,但雷隊長估計應該係咁)。

另外,官方日前亦釋出咗最新嘅「美錄坦」觀察筆記影片,可以畀廣大訓練員進一步了解呢隻謎之小精靈嘅生態系統同埋生活習性,嗚哇,雷隊長忍唔住啦好想快啲玩到Switch上嘅新作,重有一個月咋!(《Pokémon: Let's Go》將於11月16日正式推出)

捕捉「美錄坦」懶人包:
1. 將小精靈從手遊《Pokémon GO》傳送到Switch新作《Pokémon: Let's Go》
2. 《Pokémon GO》中取得「神秘盒子」
3. 使用「神秘盒子」吸引「美錄坦」現身
4. 在《Pokémon GO》捕捉「美錄坦」

*估計「美錄坦」可以依照一般方法從《Pokémon GO》傳送到《Pokémon: Let's Go》