配搭真紙真筆解謎 超有誠意密室遊戲
配搭真紙真筆解謎 超有誠意密室遊戲

豬隊友一向都好鍾意硬派解謎類遊戲,之但係呢種作品市場上買少見少,而且部分就算打住解謎旗號嘅作品,所謂嘅解謎元素都係有啲虛,唔太畀到滿足感玩家,不過呢隻啱啱先至正式推出嘅Switch作品就真係令到豬隊友眼前一亮,首先本作嘅解謎元素都算硬派,你真係要用腦諗先至過到,而且個「計謀位」好多都非常特別,過到關嗰刻真係畀到人好大滿足感同埋有會心微笑嘅感覺。不過本作最最最特別嘅地方,係呢隻Game可以配合真紙真筆去解謎嘅玩法,大大提高玩家嘅解謎投入感!

同一般淨係用遊戲機就玩得完嘅解謎遊戲唔同,呢隻名為《マドリカ不動産(Madorica Real Estate)》嘅全新作品,需要玩家自行下載相關嘅「平面圖」嚟協助解謎。故事講述你係一個房地產公司嘅新人,而你被委派嘅任務就係去啲疑似鬧鬼嘅凶宅度驅鬼,但啲鬼係唔會憑空出現嘅,你需要一步一步喺密室當中解開謎團完成任務,而單靠遊戲當中嘅資源係好難可以做到,所以玩家需要使用「平面圖」協助,所謂嘅「平面圖」可以喺官網下載然後自行Print出嚟,玩家需要喺「平面圖」上進行畫上唔同嘅筆記協助解謎,有啲關重要玩家將張紙剪剪貼貼或者進行對摺先至會搵到過關提示(重有其他模式但唔劇透太多住),本作唔再係喺遊戲中行行企企,亂撳一通就過到關,玩家嘅解謎能力會受到真正嘅挑戰。

話就話本作係單人遊戲,但玩家絕對可以Print多幾張紙搵多幾個朋友一齊解謎,又或者一個負責控制Switch入邊嘅謎題,一部分人就負責喺現實世界拆解「平面圖」,多人同樂絕對冇問題(前題你啲FD唔係「豬隊友」……)。

如果覺得Print得太多紙唔環保,官方亦都準備咗相關嘅手機應用程式(iOS同Android都有)可以模擬「平面圖」協助解謎,但豬隊友試玩過都係覺得真紙好Feel啲(某啲關用真紙會易玩一百倍),除此之外,本作亦備有繁體中文版本,唔使驚有障礙啦。本作暫時未見有實體版賣街,有興趣嘅朋友可以去Switch平台嘅Nintendo eShop度購買。