燃燒你個小宇宙啦! 《JUMP FORCE》星矢參戰確定
燃燒你個小宇宙啦! 《JUMP FORCE》星矢參戰確定

由日本集英社發行嘅《週刊少年Jump》孕育咗無數套出名嘅漫畫,捧紅咗一個又一個家傳戶曉嘅動漫人物,而其中不乏大量「戰鬥類」角色,相信唔少動漫迷都曾經幻想過,如果呢堆JUMP角色可以聚首一堂,以高清規格登上次世代主機,嚟一場大亂鬥就正啦!呢個願望唔再係夢想,事關嚟緊2019年Spike Chunsoft將會喺PC、PS4同埋Xbox One三大平台推出一部名為《JUMP FORCE》嘅組隊對戰格鬥遊戲,官方一早講明新作將會包含大量動漫迷熟悉嘅經典JUMP角色。

早前《JUMP FORCE》釋出過前導影片透露咗《龍珠》、《海賊王》、《火影忍者》、《全職獵人》、《死神》等角色已鐵定會登場,而最新嘅宣傳片則帶嚟另一重量級消息--《聖鬥士星矢》系列人物參戰確定!喺片中可以清楚見到兩大聖鬥士「星矢」同埋「紫龍」嘅戰鬥場面,二人分別施展出經典絕技「天馬流星拳」、「廬山百龍霸」,重可以「爆氣」換上唔同嘅黃金聖衣,燃度滿分!