先行體驗版配信 教你搶先免費試玩PS4《God Eater 3》
先行體驗版配信 教你搶先免費試玩PS4《God Eater 3》

上個月同大家介紹過知名嘅共鬥遊戲《God Eater》系列嘅最新續作--《God Eater 3》(http://bit.ly/2yhMmjV),呢隻Game如無意外將會喺12月13日正式推出㗎啦,而喺推出前夕,官方就先行喺PS4釋出咗體驗版畀大家試玩下先,乜話?上PS Store但係搵唔到,梗係啦,因為今次配信咗先行體驗版係日本限定,而且有時間限制,要玩嘅朋友手快有手慢冇啦。

一般嚟講香港玩家打PS4都係申請港服帳號,所以唔會搵到呢隻體驗版,要率先試玩,你哋必需先開一個日版帳號,方法非常簡單,打開你部主機,登入嗰陣揀建立新使用者,之後填資料,去到地區選項揀返日本就得,郵便番號求其打都得,例如12345678都可以,之後就可以登入日本Store搵返隻Game,又或者你好懶用下邊個傳送門都可以。

雷隊長率先試玩過,今次隻體驗版都幾完整,不論係角色外觀設定選項定係可以試用嘅武器都非常之多,畫質操控性能都有好高嘅完成度。留意返體驗版本係期間限定嘢,由即日去到10月21日(日)夜晚11點為止,有興趣嘅朋友記住喺限期前試試啦。

《God Eater 3》體驗版傳送門:http://bit.ly/2IWx488