免費大型多人對戰 操縱宇宙戰艦讓子彈飛
免費大型多人對戰 操縱宇宙戰艦讓子彈飛

多人對戰遊戲有好多種,但係唔少都係控制「一個人」去作戰,如果大家玩「單兵」類遊戲玩到悶,不妨試下呢隻名為《無畏戰艦(Dreadnought)》嘅遊戲,體驗一下做船長操縱宇宙戰艦作戰嘅快感。

《無畏戰艦》係一款以團隊對戰為基礎嘅戰艦戰鬥遊戲,主要模式採用8vs8嘅戰鬥陣容,即係最多支援16架戰艦同時對決,喺正式交戰嘅時候,玩家將會喺浩瀚嘅太空戰場中見住無數嘅飛彈同埋Laser槍飛嚟飛去,「戰亂感」十足。

玩家可以從每場戰鬥中取得經驗值同各式各樣嘅資源,藉以解鎖新戰艦、新武器,遊戲中嘅客制化系統亦都幾多元化,淨係戰艦本體已經有至少七十架,再加埋唔同嘅武器、模組,可以有上千種組合變化。

最緊要呢隻Game係Free-to-play,大家可以一蚊都唔使出就玩到(當然亦有課金系統啦),有興趣嘅朋友即刻去Steam平台下載啦!(本作早前亦提出過類似嘅PS4版本)