暴風雪同內地公司合作 《Diablo》新作居然係手遊
暴風雪同內地公司合作 《Diablo》新作居然係手遊

雷隊長繼續為大家帶嚟關於BlizzCon嘅報消息,同一個發布會,同一間公司,有人歡喜有人愁,如果你係《Warcraft》系列粉絲,你會好開心,因為系列經典《Warcraft 3》即將高清重製,但如果係《Diablo》嘅Fans,可能呢一刻你會失落到想打爆暴風雪。

BlizzCon 2018正式舉行之前,路邊社消息一早已經預告《Diablo》會有新作,正當一眾玩家以為新作會喺《Diablo 4》,又或者最差都應該有個《Diablo 1》或《Diablo 2》重製版嘅時候,暴風雪一個冷水潑落嚟,公布即將推出名為《暗黑破壞神 永生不朽》嘅手遊,你冇睇錯我冇講錯,係手遊呀!

《暗黑破壞神 永生不朽》係由暴風雪(Blizzard)聯同內地公司網易共同研發,新作將會喺一款多人線上ARPG,對應Android同iOS兩大平台,遊戲推出初期將會提供至少六種基本職業以供選擇,包括野蠻人、聖教軍、狩魔獵人、武僧、死靈法師、秘術師等等。劇情設定方面,故事時間點將會喺介乎於第二同第三集之間。

雖然新作只係啱啱發布,好多資訊都未被確認,實機畫面亦都唔太多,但好多玩家一聽到「內地公司」同埋「手遊」,網上已經畀人負皮到痴咗線,其實呢個現象都好正常,首先《Diablo》系列一向都被視炭高水準嘅「核心遊戲」,而「核心遊戲」玩家唔少都同不屑玩手遊,而家暴風雪將旗下嘅大作由Hardcore Game「矮化」成手遊,重要半外判地畀另一間內地公司參與製作,會惹起一眾粉絲不滿絕對唔難理解。就以呢條宣傳片為例,出咗冇耐,喺YouTube上就錄得超過三千個負皮,好評得一百個左右,負皮比好評多出約30倍,以一線大廠暴風雪嘅標準,大家真係憎到隻新作入骨......

睇完宣傳片,你哋又會唔會有興趣試下?(雷隊長短評:就算而家幾多人鬧都好,相信到隻Game真係出,都重係好多人會因為《Diablo》個名試一試,但留唔留得住人流,可唔可以一雪前恥,就真係睇返遊戲質量啦)