亞馬遜雨林求生日誌 極真實生存遊戲
亞馬遜雨林求生日誌 極真實生存遊戲

如果有日一覺醒來發現自己身處亞馬遜雨林,身邊乜都冇,冇人、冇裝備、冇武器,你會點樣生存落去?《Green Hell》係一款以亞馬遜雨林作為遊戲場景嘅擬真系生存遊戲,其真實程度甚至你話佢係一款「生存模擬器」亦無不可。

故事講述主角因為「某啲原因」被留低咗喺雨林當中,而且你身上冇幾多樣裝備,玩家必須要自行尋找生存落去嘅必需品,食物當然一定要搵啦,但另一方面,身處喺雨林當中,你將會面對無數大自然嘅威脅,玩家亦必須喺探索當中尋找適合嘅原材料,再加工製成合適嘅工具或武器去對抗威脅。除咗搵食物同製作工具,你喺遊戲流程當中亦需要有避難所或者居所,呢一切一切,都必須由玩家獨自一人去建立。

喺《Green Hell》中,你除咗會面對各式各樣直接嘅威脅之外,主角亦會受到唔同種類嘅隱性挑戰,例如疾病、因孤獨感而生嘅負面精神狀態等,玩家都需要自己一一解決。

本作嘅目的非常簡單,就係努力生存落去,過得一日得一日,如果重有餘力,就去尋求自己點解會被遺留喺亞馬遜雨林嘅真相。《Green Hell》嘅畫面表現亦相對出色,玩家可以喺遊戲中見識多極多樣化嘅動植物,各種活物亦有專屬嘅行為模式去畀玩家研究,而用得雨林做世界觀設定,多變嘅天氣系統同動態環境就一定要有啦!

《Green Hell》仍然喺PC平台上處於測試階段,但已經可以透過Steam頁面購買並且進行「Early Access」,即買即玩得,但先旨聲明,本作係一隻極度硬派嘅遊戲,入手之前要做足心理準備呀!