《暗黑破壞神》玩法 極爽快免費ARPG《Path of Exile》移植PS4
《暗黑破壞神》玩法 極爽快免費ARPG《Path of Exile》移植PS4

BlizzCon 2018暴風雪拎咗隻手機版《Diablo(暗黑破壞神)》出嚟招呼粉絲,惹嚟一片倒戈式嘅咒罵,無他嘅,大家都係愛之深,責之切,如果你同雷隊長一樣都係《Diablo》迷,不妨留意下呢隻即將喺年尾移植上PS4平台嘅APRG《Path of Exile》,呢隻Game基本玩法同《Diablo》非常之似,製作人亦不諱言佢哋借鑑咗《Diablo》嘅風格,不過喺參考之上亦增加咗好多新元素,整體而言玩落極之爽快。

《Path of Exile》起始共有六種唔同嘅職業角色畀玩家選擇,包括係野蠻人、女巫、遊俠、聖騎、暗影殺手同埋決鬥勇士,唔同職業有唔同技能,可以使用嘅武器、裝備同埋戰術都各有不同,故事講述主角因為某啲原因被流放到去鬼島,而鬼島上充滿住各式各樣凶殘嘅異獸同埋威脅,玩家需要為咗生存喺荒蠻之地上進行冒險,通過一關關嘅障礙逃出生天同埋解關迷團。

遊戲分成多個章節,每個章節中間都有「安全區」畀大家升級、買嘢或者抖下,本作採用同《Diablo》類似嘅模式,你可以自己單拖上陣或者組埋一班人合作過關,遊戲中亦附帶隨機地圖系統畀大家盡情刷副本,玩家即使進入同一關卡,地圖上嘅地形同敵人配置都有可能會唔同,而跌落嘅裝備、道具數值更加係千變萬化,刷到天荒地老都冇問題。

《Path of Exile》係一款由紐西蘭製作團隊Grinding Gear Games開發嘅作品,曾經由Garerna代理並喺港台地區發布,至今只係喺PC平台上玩得到。呢隻Game曾經被GameSpot評為當年「最佳PC遊戲」,IGN亦都曾經稱本作為「年度最佳角色扮演PC遊戲」,Metacritic上嘅玩家評分亦長期有85以上,可見本作來頭唔少而且風評極佳。製作團隊日前就宣布會將本作移植到家用機平台,預定12月左右大家就可以喺PS4上玩到呢隻作品。最緊要最緊要最緊要!真係好緊要所以要講三次,呢隻Game係免費㗎,只要你係PS4機主,屆時一蚊都唔使畀就玩到呢隻神作,鍾意ARPG嘅朋友千期唔好錯過啦。