20周年紀念作品! 可能係最好玩嘅《海賊王》遊戲
20周年紀念作品! 可能係最好玩嘅《海賊王》遊戲

作為Jump三巨柱(亦係舊三巨柱最長命嘅作品)之一嘅《海賊王》唔經唔覺已經推出咗20年,作為20周年紀念嘅遊戲作品《海賊王 尋秘世界(One Piece World Seeker)》最近釋出咗最新一波嘅宣傳片,比起以前嘅前導影片,今次多咗大量實機影片同戰鬥畫面,同時官方亦正式確認咗本作嘅繁體中文版本推出日期,望穿秋水,呢隻Game正式排上日程啦!《海賊王 尋秘世界》將會喺2019年3月14日於PS4同Xbox One上推出繁體中文版本!而Steam平台就會遲一日3月15日出。

《海賊王 尋秘世界》嘅故事將會發生喺一個叫做「監獄島」嘅孤島上,呢個島曾經係一個非常繁華嘅島嶼,擁有極豐富嘅天然資源,但多年前島上居民為咗對抗為奪取資源而入侵小島嘅外來者,發生咗長年鬥爭,繁華小島亦開始慢慢變質。而路飛一行人亦因機緣巧合之下嚟到呢度,並一步步揭開島上嘅各個謎團。

基本上《海賊王 尋秘世界》算係一隻開放式遊戲,玩家可以操控路飛一行人喺島上自由探索,接唔同嘅任務,幫唔同嘅人,你亦可以透過收集唔同嘅資源同埋原材料,交畀山治製作成各種食物或者有用嘅道具,又或者搵騙人布整武器、裝備。

同以往得個打字嘅《海賊王》Game唔同,你可以想像今集為有少少似GTA模式嘅《海賊王》,本作擁有大量支線任務,並且有完整嘅原創劇情,再加上本作支援4K畫質顯示(當然要你部機同輸出螢幕支援),如果你係《海賊王》Fan,應該唔會失望!雷隊長都算係半個《海賊王》粉絲,之前啲Game大致都有玩過,個人私心相信呢隻《海賊王 尋秘世界》有望成為至今最好玩嘅《海賊王》遊戲。