超越人類極限 電競史上最熱血大逆轉
超越人類極限 電競史上最熱血大逆轉

【一定要睇到最後,尾段有極大驚喜】

「電子競技」呢個名詞近呢幾年越嚟越多人認識,但其實電競呢個概念,並唔係近年先至有,而係非常之源遠流長,早喺十幾廿年前,其實世界各地已經有各式各樣嘅大型電競比賽舉行,只係當年所打嘅遊戲種類同今日嘅熱門類別有啲唔同。(其中一樣一定係MOBA,當年基本上冇乜MOBA比賽,而今時今日MOBA就變咗電競大宗)

有睇過電競比賽嘅朋友一定明白,睇電競最Happy,除咗係自己支持嘅選手或者隊伍勝出之外,一定係「反Cap」嗰下,即係兩邊陣營對決,明顯有一邊處於劣勢,甚至乎係輸梗㗎啦,但突然間嚟個超高技術,超越人類潛能嘅「大逆轉」,真係令人好難忍住唔歡呼!

而要數到電競史上最熱血嘅「大逆轉」,雷隊長認為呢個Moment真係冇對手,絕對可以穩坐最熱血榜第一嘅寶座!呢個歷史性時刻發生喺2004年嘅美國,當時喺一間大學嘅禮堂入邊,舉行緊時稱為世界第一水平嘅格鬥遊戲大賽「EVO」,打緊嘅Game就係《Street Fighter III: Third Strike》,而兩位參加者亦都非常出名,一位係用緊春麗嘅美國選手Justin Wong,當年嘅佢已經係美國格鬥遊戲界內數一數二嘅高手,而另一位用緊Ken嘅就係梅原大吾,梅原作為一位日本選手就更加出名,可以話係當年嘅日本第一,打遍天下無敵手。

當時Justin Wong同梅原大吾對決,後者處於極度劣勢,只係得返幾滴血,基本上畀人打多下就死,而喺格鬥遊戲當中,就算你用普通防禦去接「超必殺技」,都會被扣血,亦即係「擋死」,當全場觀眾見住Justin Wong個春麗出大絕,以為梅原大吾操控緊嘅Ken「死硬」嗰陣,梅原居然用上咗極上技術「真格擋(Blocking)」去進行全面防禦,所謂「Blocking」就係當對手嘅攻擊即將擊中你嘅瞬間,玩家可以以非常準確嘅時間使用「格擋」,如果過程中毫無時間誤差,你個角色就完全唔會扣血,但如果對手係用緊「超必殺技」,你就必須喺對手打中你嘅每一下之前,都非常準確,100%零誤差地使用「格擋」,先至可以毫髮無傷,基本上可以話係冇可能駕馭到嘅技術,但係當時嘅梅原大吾就以超人類嘅姿態使咗出嚟,亦以此反敗為勝!