DIY Lv.99 慈父為4歲女兒整Game
DIY Lv.99 慈父為4歲女兒整Game

俗語有話「有媽的孩子像個寶」,但雷隊長覺得有個識整Game嘅老豆更加屈機,Mon住每日有咩作品推出係雷隊長嘅每日必做嘅工作,正當今日做緊呢個Daily Work嘅時候,發現有隻叫做《Battle Princess Madelyn》嘅獨立遊戲即將會喺聽日(12月6日)正式上市,驟眼睇呢隻Game嘅玩法同《魔界村》非常相似,有嚴重嘅「致敬」之嫌,但再搵返相關資料同埋製作人嘅說話,會發現呢隻Game原來係一隻充滿住父愛嘅遊戲。

《Battle Princess Madelyn》嘅出現,係源自一位名叫「Madelyn Obritsch」嘅4歲小妹妹,因為有一位對遊戲充滿熱誠嘅爸爸,Madelyn年紀輕輕已經開始打機,而有一日小妹妹同爸爸玩緊《魔界村》系列遊戲嘅時候,就講咗句「想同Green Head對戰」(Green Head喺遊戲中嘅壞人),起初佢老豆以為佢只係想喺遊戲中打贏Green Head,問多兩問想知Madelyn喺想成為勇者,成為遊戲中嘅角色打低Green Head,而呢位名為Christopher嘅爸爸喺聽到乖女嘅願望後,真係開設咗間獨立工作室,自己做CEO,老婆做CFO,再將乖女嘅Idea一步一步化成現實。

Christopher最終參考《魔界村》玩法,配合埋愛女嘅「要求」,將佢變成遊戲中嘅勇者,再自行做埋美術設計,將相關計劃放上Kickstarter,最後成功集資到超過一百萬嘅資金,成功寫好隻Game,並且將遊戲送到PS4、Xbox One、Switch、PC四大平台同步推出。嗚哇!係父愛呀哈利!