人類突變成豬頭 高畫質獵奇回合制新作
人類突變成豬頭 高畫質獵奇回合制新作

近年主打戰鬥嘅策略遊戲真係買少見少,而其中採用回合制玩法嘅3D Game更加係非常罕有,如果你同雷隊長一樣都係回合制策略Game死忠,咁呢隻遊戲真係唔可以錯過啦。

呢款名為《Mutant Year Zero: Road to Eden》嘅全新作品採用久違嘅回合制戰鬥玩法,玩落非常之有著名系列《XCOM》嘅概視感,本作嘅背景設定亦都相當獵奇同埋吸引,故事講述喺架空世界入邊,地球因為極端氣候變化同埋未知嘅流感病毒,令到人類引以自豪嘅現代文明逐漸消亡,再加上戰爭不斷同埋各式各樣嘅生化兵器,令到人類「被消失」,隨之而來嘅就係「突變體」出現,所謂嘅「突變體」簡單啲講就係因為環境同埋生化武器影響之下,人類進化(或者退化)而成嘅生物,其中包括豬頭人身嘅妖怪、鴨頭人身嘅鴨人等等,而玩家就係要操縱呢啲「突變體」喺廢墟之中生存落去,途人會遇上更加多種奇特嘅「突變體」。

《Mutant Year Zero: Road to Eden》採取頗為獵奇同埋瘋狂嘅風格,每個遊戲角色都有自己嘅「特性」,甚至可能因為脾氣唔好唔聽你話,本作亦非常強調環境與戰術嘅互動效果,地圖環境唔再係得個樣,例如有光嘅地方你會易啲被發現,陰影可以幫你隱身,見到嘅牆壁大部分都可以破壞,亦可以整爛各種建築物去為敵人造成傷害等等,如何善用環境因素去協助作戰,將會喺本作嘅致勝關鍵。

《Mutant Year Zero: Road to Eden》已經正式上市,同步登錄PS4、Xbox One同埋PC平台,本作雖然只喺出咗短短一日,但已經喺Steam平台上拎到「Very Positive」嘅評價,鍾意合制策略Game嘅朋友不妨考慮下!