短綫炒作投資攻略及重點財經資訊
投資888分析師、CFA、CFP
粉飾櫥窗效應現 港股守得住個頂?
12月05日

粉飾櫥窗效應現 港股守得住個頂?

 

美股尋晚急插,港股今日受累下跌,但跌勢相對溫和。美港股表現不同,除了同擔心之前提及美債息曲綫倒掛擔心經濟衰退有關,粉飾櫥窗(Window Dressing)效應亦係原因之一。
粉飾櫥窗原係指百貨公司聖誕前會將櫥窗裝飾得美輪美奐,去吸引更多的生意。套係股市上,百貨公司變成基金經理,由於每到基金年結、半年結、季結,即每年的12月、6月、9月、3月底,都要交成績表,所以會做2件事:
1) 執靚投資組合,沽弱買強;
2) 將手頭上的股票炒高,從而令到投資組合的表現理想。
再配合市況去睇,美股係今年全球表現最好(雖然已從高位回落),但自低位反彈後,現時沽貨都可以保持正數,年尾花紅袋袋平安,再加上只剩兩星期就過聖誕,之前應開始轉淡,宏觀因素又唔係咁明朗:1) 特朗普係Twitter話自己係關稅人,中美談判3個月期限由12月開始計,談判領軍又係鷹派頭目,炒完關係緩和,明年風向隨時又轉;2)美債孳息曲綫部份倒掛,市場炒經濟衰退,氣氛逆轉; 3) 12月仍有幾大機會加息;4) 美經濟短期唔見有刺激因素。點計都係鎖定部份利潤着數。
反觀港股,今年跌幅跑贏全球,好多港股、中國、大中華基金見深紅,港股由2月跌到10月底,想執番靚少少係靠11月,所以多數傾向博一博,再加上A股托得住,人仔回穩,估值相對叫平,唔敢買跑輸指數壓力仲大過輸錢。不過,從低位24540點至尋日高位27260點計,反彈幅度超過11%,點數有2720點。依家要估係去定留?慎防有人開始割禾青,始終鎖定利潤可能已跑贏對手,叫有交代,況且扭虧為盈可能性極低,趁市靜前套利。
不過,港股跌500點依然強過美股,參考上兩次裂口低開都係高走,守到開市位唔穿仍有機會再升,但萬一再失守26745,沽壓可能加重,下方支持睇26500,到時市場可能轉吹島型頂。短綫要再升,呢兩日要收復到27000。個股就睇實領袖股騰訊(700)同澳門博彩股,呢批股唔大跌未必打殘信心。另外,都要一提,互聯網公司近日掀起反貪腐風,微訊又有勒索病毒等,要多提防。不過,走勢最重要,有貨可考慮失升軌才走。