作為香港人,你自問夠了解香港嗎?
為大家帶來生活熱話、香港趣事。
極猛鬼東城戲院
08月20日
極猛鬼東城戲院
極猛鬼東城戲院

唔知大家有冇睇過無線套《全院滿座》?相信有睇過嘅人應該都知,呢套劇係取材自香港舊時一間以鬧鬼聞名嘅「東城戲院」。雖然呢間戲院現已被改裝為「東城大廈」,但傳聞發生過嘅鬼故事,仍然流傳民間。

未講東城戲院嘅鬧鬼事跡之前,必先要講下佢嘅前身。呢間戲院嘅前身係「萬國殯儀館」,後來遷移咗去鰂魚涌,就由何東家族屬下嘅東成有限公司接收原址,變成「東城戲院」。唔知係咪因為前身係殯儀館嘅關係,呢間戲院開業冇耐,就不斷傳出有鬼嘅傳聞。

呢間戲院最經典嘅傳聞,就係明明只有少數人買飛入場,但場內卻「全院滿座」。當年呢間戲院嘅戲飛銷量好低,但奇怪每一次都有好多觀眾入場。由於入場人數同出售戲票嘅數目長期有出入,院方懷疑有人拎假飛博大霧入場,於是多次入場檢查戲飛,但一張假飛都發現唔到。另外又有一次,天氣好差,冇人嚟呢間戲院買飛,但就有幾個人拎著飛闖入戲院,經理覺得有古怪,就將戲院封鎖,諗住捉呢幾個人,點知點搵都搵唔返啱啱入嚟嗰幾個人。從此以後,戲院銷情就愈來愈差,最後重倒閉埋。

其實除咗呢單嘢,亦都重有一單傳得好勁嘅「廁所女鬼」傳聞。話說有個女觀眾睇戲途中去洗手間,照鏡時望到鏡中有另一個女仔企咗喺佢後面,但覺得佢好似怪怪地,於是佢挨埋啲塊鏡到望,發現嗰個女仔竟然係冇眼耳口鼻。於是嚇到佢即刻走人,行到廁所門口佢見到一個女仔準備入嚟,佢就同呢個女仔講裡面有個「冇臉女人」,點知個女仔抬起頭,撥開啲頭髮,問佢:「係咪好似我咁樣?」

雖然有人話呢間戲院嘅鬼故,係由同行派打手作出嚟,不過呢間戲院確實係由殯儀館改建而成,而戲院廁所嘅位置原身亦係停屍間嘅地窖。所以究竟鬧鬼嘅事係真定假,的確難以判斷。