作為香港人,你自問夠了解香港嗎?
為大家帶來生活熱話、香港趣事。
三個心寒短鬼故
09月07日
三個心寒短鬼故
三個心寒短鬼故

鏡中房

阿明有次返內地公幹,要喺當地酒店住宿一晚。當時佢入到去已經察覺到呢間酒店嘅大堂異常多鏡,不過佢不以為然,冇特別在意。當晚佢入到酒店房,一切都好正常,冇乜特別事發生,直到佢去沖涼。佢沖沖下涼聽到有人敲佢房門,咁佢就開門望下,點知外面冇人,但正對面間房就冇閂門,房裡面有個女人背向佢喺梳妝台前梳緊頭。嗰下佢已經好驚,即刻閂返門沖埋個涼,然後走去瞓。好彩最後都捱到朝早,但當佢離開間房時,佢先發現原來個走廊唔係房對房,而係房對鏡,即係話佢尋日喺防盜眼望到嘅原來係一塊鏡嘅倒映,即係話反射緊嘅係自己間房嘅景象……?

邊個聽電話?

阿敏有日喺街度唔見咗部電話,發現時佢已經即刻打返自己手機號碼,睇下有冇好心人執到會畀返佢。打咗一陣,個電話真係通咗,接聽嗰個係個女仔嚟。阿敏同佢講想要返部電話,點知嗰個女仔只係喺度「嗯」,都冇認真答過一句。阿敏覺得呢個女仔明玩佢,好嬲咁收咗線,諗住部電話都係拎唔返。點知過兩日,佢竟然聽到床下底有電話響嘅聲,原來佢部電話一直都喺佢床下底……

佢係邊個?

有次強仔一個人參加旅行團,因為佢冇加到錢要住單人房嘅關係,嗰晚佢被編同另一個團友一間房。入到間房時,強仔見到有個女人坐咗喺張床度,以為早有人入住,打算同酒店講換房,但團友竟然若無其事走入去,好似望唔到個女人咁。強仔知自己瀨嘢,望著個女人行嚟行去,又唔知點開聲同團友講,而團友一入到間房已經嗱嗱林去咗沖涼。當個房得返強仔一個時,個女人慢慢開始行近強仔身邊,同佢講:「我知你見到我架……」