拉鍊式行李箱 一枝筆就開到!
拉鍊式行李箱 一枝筆就開到!

年尾好多人都會去旅行,大家有冇喺行李喼上填上自己嘅個人資料呢?有啲人為怕行李寄失,會喺行李牌上仔細填寫自己嘅姓名、電話、地址,咁樣唔只將自己嘅私人資料曝光,如果係一家大細去旅行,賊人只要睇見你地址,就會估到你屋企冇人,可以上門爆格。
旅遊專家廖肇陽指填晒個人資料亦可能會引人將違禁品如毒品等塞入你個喼,之後爆門入你寫嘅地址拎返;巴西警方就曾經搗破一個以呢種手法犯罪嘅集團。另外,萬一你過關時被發現,可能會喺當地被入罪,面臨牢獄之災。
所以,如果真係想寫行李牌,就只係寫姓氏就夠。
以為個喼上鎖就唔怕畀人擺嘢或偷嘢?片中所示,如果你個喼係拉鍊式而拉鍊更比較幼身,只要用一枝原子筆就可以開到啦!