健康是最大的財富,來看看追求活力人生的故事吧。
為大家帶來運動及健康資訊。
不留餘力走到最後
11月21日
不留餘力走到最後
不留餘力走到最後

1968年嘅第19屆奧林匹克運動會係史上首次喺拉丁美洲舉行。當年,東非嘅坦桑尼亞當年係首次參加奧運,派出嘅代表包括有30歲嘅長跑手阿赫瓦里,佢本身係住喺非洲第一高峰──Mount Kilimanjaro附近地區嘅農夫嚟。

呢一屆比賽因為位處海拔逾2300米地區,對好多跑手嘅表現做成影響。而阿赫瓦里本來係非洲冠軍級人馬,開跑冇耐因覺得唔舒服而墮後。身體先出現抽筋問題,點知到賽程長度一半(約21公里)嘅標距處時,佢被跑手撞到,肩膊流晒血,而右腳膝蓋骨重移埋位,傷勢好嚴重。

醫護人員勸佢退賽,但阿赫瓦里堅持要完成賽事,醫護人員只幫佢做咗簡單嘅包紮,佢忍住痛,拐住跑去終點。賽事由埃塞俄比亞跑手Mamo Waldo以2小時20分26秒成績拿金牌。

頒獎後,廣播已宣布重有一名選手重進行緊賽事,嗰時已經係金牌選手衝刺後嘅一個鐘。攝製隊派人到賽道搵呢位「最後選手」,見到阿赫瓦里由天光跑到天黑,負重傷嘅佢已筋疲力盡,最後由全場觀眾熱烈打氣嘅伴隨下,就到終點。

賽後,阿赫瓦里解釋堅持嘅原因係:「國家唔係為咗送我到七千英里外嘅地方開始比賽,而係嚟完成比賽。」喺1983年,坦桑尼亞正式冊封阿赫瓦里為「National Hero Medal of Honour」。佢嘅體育精神真係好值得尊敬。