殘奧代表:凡事都要堅持

前日本殘奧代表泳手伊藤真波早前出席支援殘障人士嘅體育體驗會,向身障人士做演講,期間佢拉起小提琴表演,扣人心弦嘅表演令在場人士感動,有人重放上Facebook,網民更呼籲轉發畀身邊「想放棄的人」作鼓勵。

伊藤真波原名係野村真波,細個係一個好奇心好強嘅小朋友,識得游水、彈琴同拉小提琴。但喺2004年嘅冬天,20歲嘅佢駛電單車去護士學校途中不幸遇上車禍,被貨車撞倒送院,雖然保到性命,但由於右手多處骨折要截肢,令本來立志成為護士嘅佢跌入谷底。

喺關西醫院做復康運動嗰時,見到一班失去雙腿同半身不遂嘅人拼命打籃球,決定要重新振作,要想成為一個可以自立站起來嘅人。後來重新練習游水,喺08年更代表日本出戰北京殘奧,喺100米蛙式比賽中得到第4名。

為咗多謝一直支持佢嘅媽媽同朋友,佢再拎起小提琴,為媽媽奏出一曲。由於失去咗右手,要配戴特別為拉小提琴而研發嘅義臂。近年投身護理行業嘅佢亦係首位配戴義臂嘅護士。

人生唔係樣樣事情都盡如人意,但面對困境時,唔好放棄。只要有信念,所有難關都可以輕易衝破。
__________________________________
睇精彩短片